नूर आलम बादशाह के 10 गो कविता

 नूर आलम बादशाह के 10 गो कविता

(1)
मिसावट

चतुर व्यापारी बानी, बेचेनी हम चाउर.
अपना के निमन, दोसरा के समझेनि बाउर.

मसूली बिकाला बजार में, घर में पाकेला खूदी
मालूम ना काहे बिगड़ल, ऐतना जल्दी बूदी.

अपना के बड़का होशियार, दोसरा के समझेनी बागड़
दुनिया के आंख में धूरा झोंकेनी, मिलाके चाउर में आँकड़.

रेडियो से प्रचार करावेनी, कहके ऐकर बढ़िया बनाट
लोग छोरे जानऽता को केतना करेनी ऐमे हम मिसावट.

सब के धोखा देके बनल बानी बड़का व्यापारी.
हम जानऽतानी कि खाए के बेर लोग देत होई हमे गारी.

लोग के गारी बात के नईखे हमरा तनिको लाज.
हमेशा गारी सुनते बानी त काहे करी सरम आज.

हम साफा बानी बेसरम, काहे करी केहू के कहल.
ईहे आदत से त बा आज हमरा पास बड़का महल.

ऐसन व्यापार में जे कइलसि सरम ओकर फूटल करम.
पकड़ाईल त धजिया उड़ी ना त समझी पाकिट गरम.

चाउर व्यापार में ना लागी सब केहू से ऐसन कायदा.
ऐकरा चलते बाटै पेटचिरवा डाक्टर के भी खूबे फायदा.

देखऽ आज कईले बानी हम केतना तरक्की.
एमे जे उल्टा सिधा ना करे उ रहे हमेशा अनलक्की.

हमजानऽतानी जहिया होखि हम्मर परदाफाश.
ओहि दिन कतम हो जाई सारा नाफा के आश.

केहू कही थाना कचहरी, त केहू कही जेल भेजे के बात.
तब जा के हमर समझ में आई मिसावट के बात बात.

(2)
फूल

लड़का लड़की के एके समुझि, भगवान के देहल फूल.
दुनू में भेदभाव कर के मत करीं कवनो एइसन भूल.
जईसन लड़िका ओईसने लड़की, आकाश के ई तारा जून.
काट के देखऽ दुनू के देह से निकलि लाले खून.

भगवान के देहल ई फूल के दी बरोबर न्याय.
कमजोर समुझ के मत करी एकरा पर अन्याय.
दुनू के खातिर खोजी जिनगी के सही रास्ता आ उपाय.
ताकि आगे जा के दुनू दुनिया में कुछ कर के देखाय.

लड़िका जईसन एके भी इस्कूल भेज के शिक्षा दिलवाईं.
ऐकर हर कदम पर साथ दे के घर से अन्धकार भगाईं.
अपने सुनले होखम एक नारी अगर शिक्षित होइ जाई.
त समझीं जेकर घर उ जाई सात पुस्ता ओकर तरि जाई.

मत करी अपमान, एकर बा हजारो पहिचान.
एकरा बिना रच ना सकले सृष्टि जब भगवान.
तब हमनी के हई एके करे वाला कुमान.
एकरे से बननी हम तुम आ इसारा दुनिया जहान

(3)
हरदम याद आवेला माई

हरदम याद आवेला माई, गोदिया के दूध भात रोटी !
मत बहावs आशुं माई, पास में बा पोता पोती !!

फुटल किस्मत जरल करम, भईनी हम मजबूर !
राह जोह माई, आई बेटा एकदिन जरुर !!

काश होखती तहर, अंचरा के छाव में !
खेलती कूदती घर दुवारे, पुरा गावं में !!

धीरज रख माईs, साथ में नईखी अबो भी !
याद में दुबल हई, दूर बानी तबो भी !!

सुख के बास दुःख के नाश, ईहे बा हमर आश !
बा प्रयास होखेम एकदिन, तहर सपना में पास !!

दुलार के बा लिहाज़, मत होखिह हम से नाराज़ !
फेरु से तहर गोदिया में, करेम हम राज़ !!

साथ रही जबतक आशीर्वाद, होखेम न कबो बेकार ! दू साल के बाद आईब घर, ईहे बा समाचार !!

(4)
पढ़ लिख के गदहा

जवना समय में रही हम देहात,
कवि होखे खातिर दिल रहे बेताब.
जब करीं आगे बढे के प्रयास,
लोग कहे अभी काटऽ जा के घास.
सोचनी काहे ना चल जाईं उहवाँ
भोजपुरी के सेवक नइखन जहवाँ.
कुछे दिन में हो जाईब उहाँ आदमी,
सभे कही हमरा के बड़का भलादमी.
भाडा खातिर रहे ना चवन्नी अठन्नी,
घर से पैसा चोरा के पहुँचनी राजधानी.
बाप दादा के सम्पति से कइनी ऐश आराम,
कमइनी ना धमइनी, तबहूँ बा बड़का नाम.
का सुनाई, कइसे सुनाई आपन हाल,
शहरी हो गइनी, तबो बावे पहिलके चाल.
दसों साल हो गइल, तबो न सुधरल छवि.
दू चार लाइन लिखके समझेनी अपना के कवि.
एके जगे रह रह के देवेनी अंतरवार्ता,
कतना धूर्त बानी केकरो नईखे पता.
दोसर के सफलता देख के, होखेला जलन.
तबे त केहू कह देला खानदानी एकर चलन.
पढ़ लिख के लिहनी हम बड़का डिग्री.
तबो ना सुधरल चाल के सिक्री.
फूटल करम मिलल अईसन जगहा,
पढ़ लिख के हो गइनी साफे गदहा.

(5)
जूता

बुश पर बरसनी याद रखीहs
तोहरा पर न पड़े, फरियाद करीहs
अब त आदत हो गईल छरपे के
पड़ गइल गलती से त माफ़ करीहs.
 
सारा दुनिया में चर्चा आम हो गइल
बहादुर खुलेआम शर्मनाम हो गइल
प्रयोग भईल स्वागत में उनका
जूतो के अब बड़का नाम हो गइल.
 
कुछ जूतो बड़ा अजीब होला
कबो दूर त कबो नजदीक होला
नया में रोज पालिश से सफाई
पुरान में गरीब के नसीब होला.
 
पहिरऽ गोड़ में एके हथियार समुझ के
दुश्मन के पिटाई करी बुश के यार समुझ के
समय समय पर काम आई ई
मत फेंकीहऽ कचरा बेकार समझ के.

(6)
अनुभव नेपाल जनआन्दोलन २००६ के

काठमांडू गईनी,
मिलल काम जोड़े के कन्धी.
जोड़ते जोड़ते कन्धी,
होगईल अनिश्चित कालीन बन्दी.
सब केहू कहे
बन्दी होखे चाहे हड़ताल
ईहा काम चलेला सालोसाल.
सुन के दूर हो गईल
हमरो चिंता फिकिर आ गम
लेकिन कर्फ्यू के चलते
भितरे छूटे लागल दम.
कभी जुलुस कभी कर्फ्यू त कभी नारा.
आज खुली, बिहान खुली,
कहते कहते
पइसो ख़तम हो गईल.
ईहां एतना ना बदहाल
दुनिया भर के महँगी
कि केहू भईल कंगाल,
केहू भिखारी
त केहू जोगी.
नब्बे रुपये मट्टी तेल मिले,
अस्सी रुपये नून.
अईसनो संकट में लोग
गावे खली नेता लोग के गुण.
खूब कमइनी सिंगल,
डबल आ ट्रिपल झारी.
बाकिर
बइठ के खाते खाते
ख़तम हो गइल राशन सारी.
सांझ के सब आदमी कइलख लोग राय,
कइसहूं घर चले के
कईल जाओ हमनी कवनो उपाय.
घर लवटे खातिर ना मिलल
ना बस ना कोनो गाड़ी ना गाडा.
एगो मिलबो कइलख माइक्रो
त दिमाग ख़राब हो गइल
सुन के एक आदमी के चौदह सय भाडा.
बाकिर करतीं का,
चलहीं के पड़ल.
कमाये गइल रहीं.
करजा कमा के लवटि अइनी.

(7)
हाय हमर जान

हाय हमर जान, तु कहाँ चल गइलू हो
हाय हमर जान, तु कहाँ चल गइलू हो
हाय हमर जान, तु कहाँ चल गइलू हो
कालहु हमरे साथ रहलू २
आजू कहाँ खो गइलू हो
हाय हमर जान, तु कहाँ चल गइलू हो

तोहरा बिन जिनगी, भइल बेकार बा
न आँख में नींद, न दिल में करार बा
तोहरा बिन जिनगी, भइल बेकार बा
न आँख में नींद, न दिल में करार बा
कवन गल्ती के तु, सजा देताडू हो
हाय हमर जान, तु कहाँ चल गइलू हो

संघे संघे रही हमनी, दुनु एके साथ
संघे जिए मरे के, खैनी कसम साथ
संघे संघे रही हमनी, दुनु एके साथ
संघे जिए मरे के, खैनी कसम साथ
काहे एतना तडपावताडू, लगा के दिल में आग हो
हाय हमर जान तु कहाँ चल गइलू हो

दिल बा सुना सुना, चेहरा अन्जाना
तोहर सिवा हमर, कही न ठिकाना
दिल बा सुना सुना, चेहरा अन्जाना
तोहर सिवा हमर, कही न ठिकाना
जल्दी आव तु, बैठल बानी लगा के आश हो
हाय हमर जान, तु कहाँ चल गइलू हो
हाय हमर जान-२ कहाँ चल गइलू हो-२ कहाँ चल गइलू हो
हाय हमर जान तु कहाँ चल गइलू हो -३

(8)
आज भइनी हम पराई

आज भइनी हम पराई, करs अब हमरा के बिदाई.

सदा खुश रहे खातिर, दs हमके आज दुहाई.
आज भइनी हम पराई, करs अब हमरा के बिदाई.

डोली जब हमर उठ जाई, केहु रोक ना पाई.
लोर नैना से बह जाई, देखते सुनत होखी बिदाई.
रोवला से रीत ना ओराई, मन के पंछी उड़ जाई.
डोली धीरे-धीरे जाई, याद तोहर खुब आई.
मन करी लौट आईं, लेकिन मुश्किल हो जाई.
तनका दिन खातिर हमके लिहs बोलाई.
आज भइनी हम पराई, करs अब हमरा के बिदाई.

दिल रोवऽता, मन तरसऽता, अंखिया से लोर गिरऽता.
घर आँगन भइल बेगाना, नइहर छुटल मिलल नयाँ जमाना
बचपन से खईनी तोहर कमइया, आज करावऽता सब समइया.
बाबुल घर पोसाइल देहिया, पराया घर हो ता बिदईया.
सुनलऽ तनी हमर कहनवा, उहाँ लागी जल्दी मनवा.
दिनवा धरावे खातिर लेके जल्दी अईह चौठी मिठाई.
आज भइनी हम पराई, करs अब हमरा के बिदाई.

मत रोवs बाबु जी, मत रोवऽ माई,
दुनिया के ई रीत केहु से ना मेटाई.
पोसपाल के जवान करबऽ, हाथ से एकदिन छुट जाई
केहु कुछ कर ना पाई, लेके डोली सजनवा बढ़ जाई.
रोवत रोवत कंठ सुख जाई, गाँव नगर सपना हो जाई.
सब जल्दी हमके भूल जाई, ससुरे में माई बाप.
ससुरे में भाई भौजाई,
आज भइनी हम पराई, करs अब हमरा के बिदाई.

सदा खुश रहे खातिर दs हमके आज दुहाई
आज भइनी हम पराई, करs अब हमरा के बिदाई.

(9)
देखऽ सखी तीज के लहर फेरु आ गइल

लाल पियर हरिहर रंग से दुनिया रंगा गइल,
देखऽ सखी तीज के लहर फेरु आ गइल.

नारी खातिर होला ई बहुत बड़ पर्व.
पति खातिर कइल ब्रत होला अपने में गर्व.
पार्वती के तपस्या सब नारिए में आ गइल.
देखऽ सखी तीज के लहर फेरु आ गइल.

पुश्तन से आ रहल, महत्त्व एकर अनमोल बा.
भादो चढ़ते चारू ओर बजल एकर ढोल बा.
खाइल, पियल, नाचल, नइहर के पहर आ गइल
देखऽ सखी तीज के लहर फेरु आ गइल.

कुवांरियन के भोला शिव जइसन वर मिले,
विवाहितन के फूल जइसन घर खिले.
दिल आज हमार सबका ला दुआ कर गइल,
देखऽ सखी तीज के लहर फेरु आ गइल.

बरिस बरिस दिनवा पर आवेला ई आँगन में,
पिछला सारा तीत मीठ भुलाई जाला लोगन में.
हँसी ख़ुशी सारा गाँव शहर हो गईल
देखऽ सखी तीज के लहर फेरु आ गइल.

तीज के तीनो दिन एकर बड़ा महातम,
शुक्ल द्वितीय, तृतीय, सप्तऋषि जेकरा नाम.
पूरा कइला के बाद पाव से सर हो गइल.
देखऽ सखी तीज के लहर फेरु आ गइल.

लाल पियर हरिहर रंग से दुनिया रंगा गइल,
देखऽ सखी तीज के लहर फेरु आ गइल.

(10)
दीदी तु माई के मन मत रोवइहs

दीदी तू माई के मन मत रोवइहs
अबकी तीज में नइहर जरूर अइहs

हम बानी परदेश में, तू बाड़ू देश में
भाई त ना आ पाई, तू जइहs रेस में
बिरह में डूबल माई के तन मत गलइहs
अबकी तीज में नइहर जरूर अइहs

हमनी फलल फूलल, माई घर में बिया बीमार
सुख दुःख में साथ दिहs इहे बा निहोरा हमार
राह जोहत होखी माई आस, निराश मत करीहs
अबकी तीज में नइहर जरूर अइहs

मुश्किल में पड़ जाला जीवन बेमतलब के प्रचार से
समाज भी दूर हो जाला अपना दुनिया जहान से
अपना आस्था के धरोहर हिले मत दिहs
अबकी तीज में नइहर जरूर अइहs

दीदी तू माई के मन मत रोवइहs
अबकी तीज में नइहर जरूर अइहs
---------------------
नूर आलम बादशाह,
मुकाम : कोतवाली ९, जमनिया बारा, नेपाल

(नूर आलम बादशाह के ई सगरी कविता दुनिया में भोजपुरी के पहिलका वेबसाइट anjoria.com के पुरनका संस्करण में प्रकाशित भइल रहली सँ. तब अंजोरिया एचटीएमएल में बनावल जात रहुवे.बाद में जब वर्डप्रेस के सुविधा मिल गइल तब नयका संस्करण वर्डप्रेस में बनावल जा रहल बा. पुरनका संस्करण के सामग्री गँवे गँवे एह ब्लॉग पर अंजोर कइल जात रहेला. अबहियों बहुत कुछ बाकी बा. एहसे आवत जात रहीं.
- संपादक)

नूरैन अंसारी के 17 गो कविता

नूरैन अंसारी के 17 गो कविता 

 

(1) 

जमाना के रीत

अब त हर जगे रीत इहे दोहरावल जात बा,
गरीबी के अमीरी से दबावल जात बा.

काल्ह कही मुंह खोल न दे इंसाफ, कोर्ट में,
एकरा पहिले ओही पर पईसा लुटावल जात बा.

सात फेरा के बंधन के लालच में बेच के,
दहेज़ खातिर दुलहिन के जरावल जात बा.

उहे लोगवा देत बा अक्सर अब धोखा,
जेकरा खातिर खून-पसीना बहावल जात बा.

ना बड़ में बड़प्पन, ना छोटका में लेहाज़ बाँचल,
अब त डांस बार घरघर में बनावल जात बा.

'नूरैन' एके खूनवा में धरम के रंग मिला के,
भाई के भाई से खूबे लडावल जात बा.

(2)
बाढ़ अउर सुखाढ़

कुछ बाढ़ ले गइल, कुछ सुखाड़ ले गइल.
बाकी बचल तवन महंगाई झाड़ ले गइल.
कुछ उम्मीद रहे सरकार से जनता के भलाई के,
कोटा आईल लेकिन रसुखवाला उतार ले गइल.
अब त बा घर में ना राशन, ना पाकिट में पइसा,
ई सीज़न बढ़िया बढ़िया आदमी उजाड़ ले गइल.
आ जाला अंखिया में आंसू देख के खेतवा के दशा,
ख़ुशी छीन के सावन, भादो, अषाढ़ ले गइल.
कब से पढ़ लिख के घूमत रहलें बाबू बेरोजगार,
पेट के आग के खातिर कइल चोरी तिहाड़ ले गइल.
कइसे पार लागी हे भगवान अब जिनगी के गाड़ी,
आइल अइसन बिपत कि मुंह के आहार ले गइल.

(3)
बिश्वास के धग्गा

टूटत बा बिश्वास के धग्गा, बहुते जल्दी टूटत बा.
गैर लोगवा आपन होता, आपन लोगवा छूटत बा.
जरत बा रिश्ता के दिया अब मतलब का तेल से,
गरज न होखे पूरा त लोग बात-बात में रुसत बा.
घर के बात बतावल जाता दोसरा गावं के लोग से,
तीसरा क चक्कर में पड़ के दोसरा के घर फूटत बा.
मत पूछी त बढ़िया होई, अब हमदर्दी के बात,
शादी अउर सराधे में अब हित नात भी जुटत बा.
कहे के लोग आपन बा बाकिर काम पराया के बा,
एह कलयुग में बाप के हाथे, बेटी के इज्जत लूटत बा.

(4)
गउवा हमार

लागे ना निक तनको शहर में आके.
हार गईनी मनवा के लाख समझा के.
पर बही जाला अंखिया से लोरवा के धार.
मन पड़े जब कबो गउवा हमार.
भूललो से भूले नहीं बचपन के दिनवा.
नाचेला अंखिया के आगे हर सीनवा.
तब चाहे पड़े लूः चाहे पड़े खूब ठंडा.
बंद नहीं होखे कभी आपन गुली-डंडा.
आवते ही फागुन खूब होखे ठिठोली.
दादी, चाची, भौजी सबे से खेली सन होली.
दूपहरिया में जाई सन गउवा के ओरा.
बाबू साहब के बगीचा में तुडे टिकोड़ा.
शाएद अहिसन दिन कवनो जाव न खाली.
चिडअवला पर धोबिनिया देव न गाली.
दशहरा में भाई हो डाईन के डर से.
माई भेजो काजर लगा कर के घर से.
केकरा घरे कहिया आई-जाई बारात.
भले याद ना रहे सबक मगर ई रहे याद.
वो दिन स्कूल से १२ बजे आ जाईसन भाग के.
फिर देखिसन नाच खूब, रात भर जाग के.
भले एकरा खातिर खाइसन आगिला दिने मार.
मन पड़े जब कबो गउवा हमार.
फ़ोन नाही रहे तब लिखल जाव पतिया
. गउवा के सीधा-सादा लोगवा के बतिया.
हो जाव कबो कहा सुनी खेतवा के मेढ़ पर.
वोकर होखे पंचायत बड़का पीपल के पेड़ तर.
तबो लोग में होखे झमेला पर मिटे ना भाईचारा.
तनी आसा बात पर जूट जाव गाँव सारा.
वो बेरा जवार में हमार गावँ रहे अईसन अकेला
. जहा लागे रामनवमी,मुहर्रम आ तेरस के मेला.
सुस्ताव लोग गर्मी में फुलवारी में जाके.
ओही जग लेटे लो पेड़ तर गमछा बिछा के.
आवे जब परब छठ, पिड़ीया, जिवितिया.
मेहरारू सब गाँव के गावसन गीतिया.
जवन आनंद मिले गवुआ के खेत-खलिहान में.
उ बात कहा बाटे शहर के पार्क-उधान में.
अब त चमक धमक ये शहर के लागेला खाली-खाली.
खिचेला हमरा मन के डोर फिर गाँव के हरियाली.
कहे, का हो तू भूला गईल अ जनम-धरती के प्यार.
मन पड़े जब कबो गउवा हमार.

(5)
नईहरवा छोड़े के पड़ी

पियवा के घरवा से नाता एक दिन जोड़े के पड़ी
केतनो बढ़िया होईहें नईहरवा, बाकिर छोड़े के पड़ी.

आखियाँ झर-झर लोर बहाई.
जिअरा रहि-रहि के पछताई.
बतिया बिछ्ड़ल सखियन के,
मन के याद हमेशा आई.
हंस-हंस अंखिया के लोरवा, बटोरे के पड़ी.
केतनो बढ़िया होईहें नईहरवा बाकिर छोड़े के पड़ी.

माई बाबुजी के प्यार.
भईया भाभी के दुलार.
कईसे भूल जाई मनवा,
छोटका छोटकी से तकरार.
करेजवा के टुकडा से मुंह आपन मोड़े के पड़ी.
केतनो बढ़िया होईहें नईहरवा, बाकिर छोड़े के पड़ी.

जब छूटी बचपन के निशानी.
लागी सगरी दुनिया बिरानी.
पर निभावे के पड़ी हर हाल में,
दुनिया के दस्तूर पुरानी.
फूलवा ससुरारी के बगिया के लोढे के पड़ी.
केतनो बढ़िया होईहें नईहरवा, बाकिर छोड़े के पड़ी.

(6)
केतना बदल गइल ज़माना.

ना रहल पुरनका लोग, ना रहल जुग पुराना.
भरल बाज़ार में झूठा मारे, सच्चाई पर ताना.
केतना बदल गइल ज़माना.

लड़की राखे केश छोटा, लडिका राखस लम्बा.
लव मैरिज़ के घटना पर लोग के होखे न अचम्भा.

बीतल जुग चिठ्ठी के, जबसे आइल बा मोबाइल.
कम कपड़ा में बाहर निकलल बनल बा स्टाइल.
लाज शरम के रीत हो भईया हो गइल पुराना.
केतना बदल गइल ज़माना.

धरम के दुकान चलावे लागल इहाँ अधर्मी.
संस्कार के शिक्षा देबे लागल बा बेशर्मी.
पूजा पाठ के बेरा चलेला हर घर में अब टीवी.
मरद सम्भारस चुल्हाचउका, बेडे पसरस बीबी.

मंदिर-मस्जिद में बाजेला रोज फ़िलिम क गाना.
केतना बदल गइल ज़माना.
ख़तम भइल मन क नगरी से मोह-माया आ प्यार.
एके गो आगन में उठल जबसे कई कई गो दीवार.

अब त औरत करे नौकरी मरद अगोरस घर के.
बाबू जी से पहिले बेटी खोजेली अब वर के.
हर क्षेत्र में मरद से आगे होगइली जनाना.
केतना बदल गइल ज़माना.

(7)
नेताजी

दिन भर में दस हाली धांगत बाड़न गाँव.
केहू के चुमस माथा, केहू के छुअस पाँव.
केतना बदल गइलन नेताजी, आवते चुनाव.
हाथ जोड़ के वोट खातिर कइसे घिघियात बाड़े.
लोग देत बाटे गाली तबो ऊ खिखियात बाड़े.
जनता के बात पर नाही तनको खिसियात बाडेन.
इ उहे हउवन काल्ह तक जेकर गजबे रहे भाव.
केतना बदल गइलन नेताजी आवते चुनाव.
झकले ना एको हाली, गइलें जब से जीत के.
चिन्हले हमेशा अपना रिश्तेदार, अपना हित के.
भुल गइलन साफा ई राज-धरम के रीत के.
आज पड़ल जब जरूरत त करत बाड़ें छाव.
केतना बदल गइलन नेताजी आवते चुनाव.
कइलें ना काम कभी जन-प्रतिनिधि के.
थमले इ डार हरदम हरिहर ओधि के.
आज दोष सगरी देत बाडेन अपना बिरोधी के.
लहावत बाडेन जीते खातिर एक से एक ई दाँव.
केतना बदल गइलन नेताजी आवते चुनाव.

(8)
उधार के जिनगी

ना रोअले रोआत बा, ना हंसले हसात बा.
मत पूछी बोझ जिंदगी के, कईसे ढोआत बा.
कर देहलस बेभरम महंगाई आदमी के,
उधार लेके जिनगी के गाडी खींचात बा.

कबो बाढ़ आइल त कबो सुखाड़ ले गइल,
खेत त हर साल निमने बोआत बा.
अब त मुंह फेर लेत बिया अपने मेहरारू,
पॉकेट में जइसे पईसा ओरात बा.

आजकल समझे ना केहू मजबूरी आदमी के,
कहत बा अच्छा बुरा जेकरा जवने सोहात बा.
ना निमने में जश बा, ना बउरे में बरकत,
सरसों खाँ कोल्हू में आदमी पेरात बा.

(9)
बेटी

बड़ा भाग्य से घर में होला बेटी के अवतार.
लक्ष्मी मान के पूजा करऽ, मत समझऽ तू भार.
दोसरा घर के सम्पत हई तहरा घरे ना रहिहन.
उठते डोली इनकर ई एक दिन सपना हो जइहन.
चल जइहेन फेर छोड़ के तोहार घर आ संसार.
बड़ा भाग्य से घर में होला बेटी के अवतार.

हर केहू ए दुनिया में आपन भाग्य लेके आवेला.
खरचा नाहीं केहू के, दोसर केहू चलावेला.
सबकर दाता उहे हउवन जेकर बा महिमा अपार
. बड़ा भाग्य से घर में होला बेटी के अवतार.

ई संसार के जननी हई, मत रउवा दुत्कारी.
बेटी के बिपत समझ के ताना कबो ना मारी.
बबुनी के भी बबुआ खानि करत रही दुलार.
बड़ा भाग्य से घर में होला बेटी के अवतार.

(10)
संस्कार के दशा

निमने बतिया लोग के ख़राब लागत बा.
धतूर जइसन कडुआ गुलाब लागत बा.
करीं झूठे बड़ाई त खुश बा लोग,
साँच बोलला पर मुंह में जाब लागत बा.
बाबू माँगत बाडेन बुढऊ बाबू जी से पानी,
अब त बाप नौकर आ बेटा नवाब लागत बा.
मुंह मारी एईसन ज़माना के भाई,
जेईमें लोग के अमृत से बढ़िया शराब लागत बा.
मत पूछी त बढ़िया होई संस्कार के दशा,
बबुनी के भर देह के कपड़ा ख़राब लागत बा.
लद गईल जुग ईमानदारी के "नूरैन"
अब त पाई-पाई के भाई में हिसाब लागत बा.

(11)
दाल दुर्लभ हो गईल

लोग रखे लागल रसोई में सोना खान सम्भाल के.
कबो बन जाला हित-नात के अईला पर निकाल के.
बढ़ गईल भाव जब से भाई हो दाल के.
टूटल जोड़ी दाल-भात-सब्जी के,बितल युग पुराना.
रोक ला गईल स्वाद पर आईल एईसन ज़माना.
बड़ा मुश्किल से कबो दर्शन इनकर हो जाला.
ना त धनी-मनी लोग के ही रोज इ भेटाला.
आजकल अटावल जाता घर-भर के पानी खुबे डाल के.
बढ़ गईल भाव जब से भाई हो दाल के.
जहा देखअ वही जग लोग गुण दाल के गावत बा.
दाल के महिमा के आगे हर केहू सर झुकावत बा.
कहल बा की दाल के दर्शन के बिना हर भोजन बा सुना.
लेकिन दर्शन दुर्लभ हो गईल जब से दाम भईल दुगुना.
लागत बा इनाम महंगाई में इ जीत लिहेन साल के.
बढ़ गईल भाव जब से भाई हो दाल के.

(12)
लाजवाब लागे लू

कबो चम्पा, कबो चमेली, कबो गुलाब लागे लू.
नया बोतल में रखल पुराना शराब लागे लू.
अईसे त हर अदा में तू हमके निक लागे लू
मगर जब हँसे लू त तू लाजवाब लागे लू.
तहरा महक से गमकेला पतझड़ में फूलवारी,
गौर से देखला पर तू मदिरा के तालाब लागे लू.
जब केश तहार लहराला त घिर जाला बदरी,
बलखा के चले लू त नागिन के हिसाब लागे लू.
सावली सूरत, मोहनी मूरत, कोयल जइसन राग,
तू कौनो कवि के कल्पना के सुंदर किताब लागे लू.

(13)
जिन्दगी परदेशी के

दिल रोवेला, अंखिया से बहेला आंसू.
कुछ देर अउर ठहर जाए के, कहेला आंसू.

पर हालात के आगे बेबस, मजबूर होखेलें.
जब एक परदेशी अपना घर से दूर होखेलें.

मत पूछी केतना निर्मम होला घर छोड़े के दुःख.
माई, बाबूजी औलाद से आपन मुंह मोड़े के दुःख.

त्याग जनम-धरती के हर त्याग से बड़ ह.
पर भूख पापी पेट के हर इच्छा के जड़ ह.

उ जीवन में कुछ कर गुजरे के लालसा से भरपूर होखेलें.
जब एक परदेशी अपना घर से दूर होखेलें.

बितल बतिया बचपन के रोके ले हमरा पांव के.
किरिया खियावे हमसे की मत छोड़अ अपना गांव के.

मगर मजबूरी इन्सान के हर किरिया पर भारी ह.
लेखा-जोखा जीवन के भगवन के चित्रकारी ह.

फर्ज से केहू के बाप, भाई, बेटा त केहू के सिंदूर होखेलें.
जब एक परदेशी अपना घर से दूर होखेलें.

(14)
आ गइल बसंत

सर्दी, ठिठुरन, कँपकँपी के बीतते तुरंत.
ओस, पाला, शीतलहरी, के होते ही अंत.
झुमत, गावत, हंसत हँसावत आ गइल बसंत.

मोजर धइलस आम पर, गमके लागल फुलवारी.
खेत सजल सरसों के, जईसे कौनो राजकुमारी.
झडे लागल पत्ता पुरनका, फूटे लागल नया कपोल.
साँझ सबेरे सुने के मिले, कोयल के मीठे बोल.
जब बहे बयरिया पुरवईया, फसल खेत लहराय.
देख के सफल मेहनत आपन,खेतिहर खूब अगराय.
जईसे साधना सफल भइला पर खुश होखस संत.
झुमत, गावत, हंसत हँसावत आ गइल बसंत.

चूमे माथा धरती के उगते किरिनिया भोर में.
चादर हरियाली के पसरल गँउआ के चारू ओर में.
रतिया भी लागे सुहावन, निमन लागे धुप भी.
हल्की ठंडी, हल्की गर्मी से बदलल मौसम के रूप भी.
खटिया में गुटीयाइल बुढऊ, खड़ा भईलेंन तन के.
ये रंग-गुलाल के मौसम में, चहके चिरई मन के.
पंख लगा के इच्छा सबकर, उड़े चलल अनंत.
झुमत, गावत, हंसत हँसावत आ गइल बसंत.

(15)
पइसे माई-बाप बा

पइसा के बिना जिनगी, जिअल अभिशाप बा
सच कही, त पइसे बा धरम, पइसे माई-बाप बा.
पइसा ना होखे त, अपनो पराया बा.
पइसे से प्रेम, पइसे से मोह-माया बा.
पइसे से चलत बा सगरी रिश्तन के गाडी.
लोग पइसे से होशियार बा,पइसे बिन अनाडी.
बिक जाला पइसा पे अनमोल ईमान.
पइसे खातीर आदमी बन जाला शैतान.
अगर पाकेट में बा पइसा त सात खून माफ बा.
सच कही, त पइसे बा धरम, पइसे माई-बाप बा.

अवगुण भी पइसा वाला के गुण लागेला.
पइसा खातिर पाप कइल भी पुन लागेला.
हर समय पइसा के महिमा अपरंपार बा.
अमीर गरीब सबके पइसे से प्यार बा.
आदमी के पइसे बनावेला दरिद्र अउर दानी.
मिटी ना कबो दुनिया से पइसा के कहानी.
'नुरैन' जिनगी के हर मोड पर पइसे के छाप बा.
सच कही, त पइसे बा धरम, पइसे माई-बाप बा.

(16)
हँसे के खरमास

दुख ए दुनिया में केकरा पास नइखे.
बाकिर हर केहू रउआ खान उदास नइखे.
ज्यादा सोचेब त तिल ताड़ बन जाई.
चार दिन के जिनगी पहाड़ बन जाई.
बताई ना ख़ुशी के, केकरा तलाश नइखे.
बाकिर हर केहू रउआ खान उदास नइखे.
सबर करेब त रात भी बिहान हो जाई.
आ बेसब्री में ख़ुशी भी जियान हो जाई.
केकरा मन में अशांति के निवास नइखे.
बाकिर हर केहू रउआ खान उदास नइखे.
मत चिंता से चेहरा के चमक बिगाड़ी.
डगरे दी लाहे-लाहे जिनगी के गाड़ी.
हँसे खातिर कवनो मास में खरमास नइखे.
बाकिर हर केहू रउआ खान उदास नइखे.

(17)
कहत बाड़ी मंगरू के माई

छाती पीट पीट कहत बाड़ी मंगरू के माई -
आ ई हो दादा अबकी बार ले डूबल महंगाई.

आ ई हो दादा अबकी बार ले डूबल महंगाई.
केतनो काटी पेट पर बाचे ना एको पाई.
ना जियले में जश बा ना मुवले में भलाई.
छाती पीट पीट कहत बाड़ी मंगरू के माई.

पता ना कवना पार्टी के भइल बाटे शासन.
महंगा भइल दाल-सब्जी, कोटा में नइखे राशन.
अइसन आग महंगाई के लागल बा सामान में.
कि हिम्मत नइखे करत कबो, जाये के दुकान में.

चारू ओर लूट खसोट के बाजत बाटे बाजा.
लोग हड़प के धन गरीब के हो जात बा राजा.
साधू के भेष में लोगवा बन गइल कसाई.
छाती पीट पीट कहत बाड़ी मंगरू के माई.

पईसा वृधा-पेंशन के रास्ता आपन भुलाइल.
बीपीएल क सूची में हमार नाम नाही आइल.
हर काम में पईसा चाही घूस के बाज़ार बा.
बिना सोर्स के दउड़ल धूपल सब कुछ बेकार बा.

मन के पीड़ा मन में लेके डहकत बाटे जिअरा.
घर में आग लगावत बा जे रहत बाटे निअरा.
बिना काम के लोगवा दिन भर करत बा कुचराई.
छाती पीट पीट कहत बाड़ी मंगरू के माई. 

----------------------------
नूरैन अंसारी
ग्राम - नवका सेमरा, पोस्ट - सेमरा बाज़ार,
जिला - गोपालगंज (बिहार)
 

(नूरैन अंसारी के ई सगरी कविता दुनिया में भोजपुरी के पहिलका वेबसाइट anjoria.com के पुरनका संस्करण में प्रकाशित भइल रहली सँ. तब अंजोरिया एचटीएमएल में बनावल जात रहुवे.बाद में जब वर्डप्रेस के सुविधा मिल गइल तब नयका संस्करण वर्डप्रेस में बनावल जा रहल बा. पुरनका संस्करण के सामग्री गँवे गँवे एह ब्लॉग पर अंजोर कइल जात रहेला. अबहियों बहुत कुछ बाकी बा. एहसे आवत जात रहीं.
- संपादक) 

अभय त्रिपाठी जी के कविता संग्रह - दुसरका खण्ड

अभय त्रिपाठी

(बनारस, उत्तर प्रदेश)

रामजी के आईल बरात  

 रामजी के आईल बरात जनकपुर बाजे बधऽईया,
उनकर लीला बा अपरम्पार जनकपुर बाजे बधऽइया.

राजा जनकजी के चिन्ता हरले, सियाजी के मनवा के मनसा पुरवले.
सब भईयन के कइले बेड़ा पार जनकपुर बाजे बधऽईया.
रामजी के आईल बरात..........

सब नर-नारी पशु-पक्षी प्रानी, हरषि हरषि गुन गावत जानी.
रिषी मुनियन से मिलल आशीर्वाद जनकपुर बाजे बधऽईया.
रामजी के आईल बरात..........

सगरे जनकपुर के राजदुलारी, हो गईली प्रभु राम के प्यारी.
उनकर डोली चलल ससुराल जनकपुर बाजे बधऽईया.
रामजी के आईल बरात..........

रामजी के आईल बरात जनकपुर बाजे बधऽईया,
उनकर लीला बा अपरम्पार जनकपुर बाजे बधऽइया.
-------------------

मगन भइल मनवा

मगन भइल मनवा हरि गुन गाइब,
मगन भइल मनवा ...........

गंगा नहाईब ना तीरथ जाइब घरवे में हम अलख जगाईब,
दान पुण्य कऽ विधि ना जानी सब कुछ आपन देहि लुटाईब.
मगन भइल मनवा ...........

छल प्रपन्च से नाता तोड़ब अपना पराया भेद मिटाईब,
सब कर बड़ा पार लगाईब सबही के अपनाईब हो रामा.
मगन भइल मनवा ...........

मन्दिर मस्जिद में ना भुलाईब राम रहीम सब एकही मानिब,
सच्चाई के गला लगाईब सगरे दर्शन पाईब हो रामा.
मगन भइल मनवा ...........

............... 

भजन कर जिभिया.

भजन कर जिभिया काहे बऊरानी भजन कर जिभिया.

यह जग थोडे़ दिन कऽऽ बसेरा, रिश्ता नाता सुख सपना कऽऽ,
भ्रम टूटे बिलगानी भजन कर जिभिया काहे बऊरानी .

बालकपन में खेल में भागे बृद्ध भये तन काँपन लागे,
का करिहो अभिमानी भजन कर जिभिया काहे बऊरानी .

दिन दिन बितल जाये उमरिया समय गुजरले कुछ होईऽ न गोइयाँ,
सिर धुन धुन पछतानी भजन कर जिभिया काहे बऊरानी .

एक से बढ़कर एक गुमानी जात पात में डूबल ग्यानी,
समरथ भये अलसानी भजन कर जिभिया काहे बऊरानी .

भजन कर जिभिया काहे बऊरानी भजन कर जिभिया .
..........

माया बा दुखदाई हो मनवा

माया बा दुखदाई हो मनवा माया बा दुखदाई,
एहि पल छीना ओहि पल दीना सदा रहे उलझाई
माया बा दुखदाई हो मनवा माया बा दुखदाई.

घर में बन में मन मन्दिर में बइऽठ के धाक जमाई,
के बा आपन के बा पराया भेद दिहि बतलाई.
माया बा दुखदाई हो मनवा माया बा दुखदाई.

बिटवा माई और बाबु से बहुते फूट कराई,
सात जनम कऽ रिश्ता भी बहुते रार मचाई.
माया बा दुखदाई हो मनवा माया बा दुखदाई.

ना कोई ले आइल बा भइया ना कोई ले जाई,
एहि से ध्यान हटा के भइया कर लऽऽ तू चतुराई.
माया बा दुखदाई हो मनवा माया बा दुखदाई.
..............

सच बा गुरु के बचनिया

सच बा गुरु के बचनिया हो रामा जगतिया में केहु नाही अपना,
केहु नाही अपना हो सब कुछ सपना जगतिया में केहु नाही अपना.

काम नाही अइहैं धन दौलतिया ना होइहैं कोइ संगी संघतिया,
सूर, रहीम गइलैं मीरा जइसन ग्यनिया छोड़ि छोड़ि आपन निशनियाँ.
जगतिया में केहु नाही अपना.

तोहके नचावेले माया के पुतरिया ग्यान पर चलावे सगरे कटरिया,
अबहु ले सोच भइया धर के धयनवा हो जइहैं तब तोहरो ठेकनवा.
जगतिया में केहु नाही अपना.

एक दिन उड़ी जइहैं काया के सगनवा केतनो तू करबऽऽ जतनवा,
भाई बन्धु सब देखइहन नयनवा माया मिली न राम ए भइया.
जगतिया में केहु नाही अपना.

सच बा गुरु के बचनिया हो रामा जगतिया में केहु नाही अपना,
--------

इक दिनवा पछतऽईबऽऽ हो मोरे मनवा

इक दिनवा पछतऽईबऽऽ हो मोरे मनवा इक दिनवा पछतऽईबऽऽ.

भाई बन्धु हो जइहें बेगनवा,
जरिहें अकेले तोहरो परनवा.
माटी में मिल जइबऽऽ हो मोरे मनवा इक दिनवा पछतऽईबऽऽ.

धन दौलत और छूटी भवनवाँ,
जेहि खातिर हो गईलऽऽ बेइमनवा.
कुछुओ ना रह जाई हो मोरे मनवा इक दिनवा पछतऽईबऽऽ.

लागी दरबार होखी तोहरो बयनवा,
का कहबऽऽ जब खाली बा खजनवा.
लोरऽवा खूब चूअइऽब हो मोरे मनवा इक दिनवा पछतऽईबऽऽ.

दीनन हीनन से न राख तू गमनवा,
तोहपे लगईऽऽहैं वार तोहरे ईमनवा.
फिर पछताई के का करबऽऽ हो मोरे मनवा इक दिनवा पछतऽईबऽऽ.

इक दिनवा पछतऽईबऽऽ हो मोरे मनवा इक दिनवा पछतऽईबऽऽ.
............

दशरथ के ललन रऊआ धन बानी

धन बानी धन बानी धन बानी
दशरथ के ललन रउआ धन बानी.

बक्सर जाइके ताडका मरली
रिषी मुनियन के यज्ञ करवलीं
गौतम नारी अहिल्या के तरले बानी
दशरथ के ललन रउआ धन बानी.

जाइ जनकपुर शिव धनुष के तोडली
परशुराम के मान गिरवली
सियाजी के मनसा पुरवले बानी
दशरथ के ललन रउआ धन बानी.
.............
 

फगुनवा रास ना आवे

पियवा गइले परदेश फगुनवा रास ना आवे,
ना भेजले कउनो संदेश फगुनवा रास ना आवे।।

ननदी सतावे देवरा सतावे,
रही रही के जुल्मी के याद सतावे।
सासुजी देहली आशीष फगुनवा रास ना आवे।।

सखिया ना भावे नैहर ना भावे,
गोतीया के बोली जइसे आरी चलावे।
नींदियो ना आवे विशेष फगुनवा रास ना आवे।।

बैरी जियरवा कइसो ना माने,
रहि रहि नैना से लोरऽवा चुआवे
काहे नेहिया लगवनी प्राणेश फगुनवा रास ना आवे।।

पियवा गइले परदेश फगुनवा रास ना आवे,
ना भेजले कउनो संदेश फगुनवा रास ना आवे।।
..........

प्रीत करे मीत के पुकार हे सजनी

प्रीत करे मीत के पुकार हे सजनी डासल सेजरिया जहर भऽइल।।

दिहल केवरिया पवनवा खोलावे बरबस बेदर्दी के याद ले आवे,
रोय भरे सोरहो सिंगार हे सजनी डासल सेजरिया जहर भऽइल।
प्रीत करे मीत के पुकार हे सजनी डासल सेजरिया जहर भऽइल।।

छिटके चंदनिया अऽगीनिया लगावे सुतलस नेहिया इऽ बैरिन जगावे,
भावे ना अङ्गना दुआर हे सजनी डासल सेजरिया जहर भऽइल।
प्रीत करे मीत के पुकार हे सजनी डासल सेजरिया जहर भऽइल।।

पिहके पपिहरा पनघट किनारे अपनी मोरनिया का मोरवा दुलारे,
सम्हरे न गगरी हमार हे सजनी डासल सेजरिया जहर भऽइल।
प्रीत करे मीत के पुकार हे सजनी डासल सेजरिया जहर भऽइल।।

सगरो फुलवरिया के फुलवा फुलाईल बन मतवारे भवरवा लोभाऽईल,
सहलो ना जाला बहार हे सजनी डासर सेजरिया जहर भऽईल।
प्रीत करे मीत के पुकार हे सजनी डासल सेजरिया जहर भऽइल।।

सरसो से खेतवा पियराइल बिरहन कोयलिया के बिरहा उमड़ाइल,
नीर झरे साँझ भीनसार हे सजनी डासल सेजरिया जहर भऽइल।
प्रीत करे मीत के पुकार हे सजनी डासल सेजरिया जहर भऽइल।।

------------

बलम हमके टीवी मँगा दऽ

फिर आईल किरकिटिया बुखार बलम हमके टीवी मँगा दऽ,
नाही करबे हम कउनो सिंगार बलम हमके टीवी मँगा दऽ।।

वर्ल्ड कप हवे एकर अंगरेजी नाम,
नाही करबे हम कउनो काम धाम।
काम आई ना कउनो जुगाड़ बलम हमके टीवी मँगा दऽ।।

चार बरिस में एक बारि आई,
सारे देशवा पर नशा छा जाई।
जगतिया में फैलल ईऽ छुतिया बवाल बलम हमके टीवी मँगा दऽ।।

सचिन तेन्दुलकर अऊर रिकी पोटिंग,
युवराज अउर सहवाग के होइ जाई सेटिंग।
चौका छक्का के हो जाई बऊछार बलम हमके टीवी मँगा दऽ।।

वेस्टइंडीज के द्वीपन पर लग जाई मेला,
सोलह देशन के खिलाड़ी देखइहैं आपन खेला।
इंडिया पर लागल बड़ा दाँव बलम हमके टीवी मँगा दऽ।।

किरकिट ही खईऽबे किरकिट ही पहिनबे,
इंडिया के जीतला पर जलसा मनईबे।
रसोई से हो जाई महिना भर के लीव बलम हमके टीवी मँगा दऽ।।

फिर आईल किरकिटिया बुखार बलम हमके टीवी मँगा दऽ,
नाही करबे हम कउनो सिंगार बलम हमके टीवी मँगा दऽ।।
.............

मीत बिना गीत लागे फागुन के जहरी

डोले फगुनऽईया जब डार पात लहरी,
मीत बिना गीत लागे फागुन के जहरी।
 
कुहुके कोयलिया तऽ पीरा होय गहरी,
अन्हियारे पिपरा पकड़िया जब झहरी।
फरल फुलायल सब गोयड़े कऽ रहरी,
भिनसारे महुआ से महुआ जब झहरी।
मीत बिना गीत लागे फागुन के जहरी।
 
संघिया के मार से प्रति नित कहरी,
मटक चले गोरी जब ताल व नहरी।
बिरहन सताये जब बसंत के प्रहरी
असुँअन छिपाये खातिर करे बरजोरी।
मीत बिना गीत लागे फागुन के जहरी।
 
फूलन पर भँवरा के झुण्ड आ ठहरी,
सबके घर अइलन जब परदेशी शहरी।
छलकल बिरह रस नैनन की डहरी,
शिकवा शिकायत के लागल कचहरी।
मीत बिना गीत लागे फागुन के जहरी।
 
डोले फगुनऽईया जब डार पात लहरी,
मीत बिना गीत लागे फागुन के जहरी।
...........

बदरा घुरि घुरि आवे अँगनवा में

बदरा घुरि घुरि आवे अँगनवाँ में नींद नाहि आवे भवनवाँ में।।
 
मनके महल में सूधिया के पहरा प्रीत के हिड़ोले बिरहल लहरा,
दिल तार तार होला सपनवाँ में नींद नाहि आवे भवनवाँ में।।
 
आस के डरिया में आँख अझुराइल मोह से आपन लोरवा टकाइल,
केहु लुक छिप जाला परनवाँ में नींद नाहि आवे भवनवाँ में।।
 
नोचे खसोटेले रात सुधराई कोसे मसोसेले मारवान मिताई,
तनि आड़ घाँट बोधे बिहनवा में नींद नाहि आवे भवनवाँ में।।
 
बैरिन बयरिया डोले बल खाय के कंगना पयलिया बोले इठलाय के,
चैन आवे न बैरी सँवनवा में नींद नाहि आवे भवनवाँ में।।
 
बदरा घुरि घुरि आवे अँगनवाँ में नींद नाहि आवे भवनवाँ में।।
............

ई कइसन जिनगी के खेला

ई कइसन जिनगी के खेला ई कइसन जिनगी के मेला,
ना कोई कुछ ले आईल बा ना ले जाई एगुड़ो धेला।।
 
काल करावे खेला लेकिन भूल गईल सब आपन बेला,
खून के होली खेल रहल बा स्वार्थ भरल दुनिया के रेला।
ई कइसन जिनगी के खेला........।।
 
भाई के भाई दुश्मन भईल बा न नाही बाचल कउनो थैला,
नारी ही नारी के काटत जिसम हो गईल ओकरो मैला।
ई कइसन जिनगी के खेला........।।
 
इंसानन के बीच में भगवन ई कइसन हैवानी खेला,
मात खा गईल जानवर जानी बचल रह गईल ठेलम ठेला।
ई कइसन जिनगी के खेला........।।
 
कलयुग कहके केतना खेलब आपन ई माया के खेला,
खतम हो रहल दुनिया बा प्रभु अब त खोलीं आपन थैला।
ई कइसन जिनगी के खेला........।।
 
ई कइसन जिनगी के खेला ई कइसन जिनगी के मेला,
ना कोई कुछ ले आईल बा ना ले जाई एगुड़ो धेला।।
..........

कइसन-कइसन जिनगी

का का कहीं कइसे चुप रहीं हम हर कदम पर सवाल करेला जिनगी,
जिनगी खुद एक सवाल बन गईल देख के कइसन कइसन जिनगी।।
 
माई के दूध खातिर बचवन लोग के अफनात जिनगी,
दस रूपया खातिर सौ रुपया के गोली खात जिनगी।
हर मौके पर लाचारन के लूऽटत खसोटत जिनगी,
पापी पेट खातिर आपन जिसम लुटावत जिनगी।
जिनगी खुद एक सवाल.....।।
 
जिनगी के खेला में दुसरा के जिनगी लुटावट जिनगी,
माई-बाबू के सेवा के बदला कुकुरन के घुमावत जिनगी।
सन्यास लेहला के बाद भी विलासिता से भरपूर जिनगी,
जवन चीज आपन ना बा ओ खातिर खून बहावत जिनगी।
जिनगी खुद एक सवाल.....।।
 
रिश्तन के टूटत सिमेन्ट से आपन गृहस्थी बसावत जिनगी,
नेतावन के मतलब परस्ती से जनता के बेहाल भईल जिनगी।
दुसरा के माल पर राजा बने कऽ ख्वाव देखत भईल जिनगी,
जवन डाल पर इंसान बऽईठल बा ओही डाल के काटत जिनगी।
जिनगी खुद एक सवाल.....।।
 
का का कहीं कइसे चुप रहीं हम हर कदम पर सवाल करेला जिनगी,
जिनगी खुद एक सवाल बन गईल देख के कइसन कइसन जिनगी।।
.............

गीत कहीं या गजल

गीत कहीं या गजल सब एहि में कहाईल बा,
आपन बर्बादी के हाल सब एहि में कहाईल बा।।
 
पढ़े के उमरिया में किरकिटिया खेलाईल बा,
एक से एक मँहग बल्ला किनाईल बा।
आज उहे बल्ला से हमार कपड़ा धुलाईल बा,
हमरा पहिला शौक के धुआँ धुआँ उड़ाईल बा।।
गीत कहीं या गजल..........।।
 
बाबुजी के कहना ना एगुड़ो सुनाईल बा,
लागल हमके फिल्मी रोग ईऽ कहाईल बा।
हर लड़की में हमरा हिरोईनी देखाईल बा,
हर सपना हमार टुटके बिखराईल बा।।
गीत कहीं या गजल..........।।
 
कमाई के बेला तऽ बस हाथे मलाईल बा,
इन्टरव्यु में कलकत्ता के मुबंई सुझाईल बा।
सिफारिश के बिना बस किस्मतिया कोसाईल बा,
चुग गइला खेत के बाद ही दुनिया पछताईल बा।।
गीत कहीं या गजल..........।।
 
आपन हाल देखके ही एगो सीख याद आईल बा,
जिनगी के खेल में हुनर ही सबसे बड़ मिसाईल बा,
ई कहनी तऽ आपन बाटे राउर खीस काहे निपोराईल बा,
अइसन त नईखे ई रचना में रऊओ कहनी दोहराईल बा।।
गीत कहीं या गजल..........।।
 
गीत कहीं या गजल सब एहि में कहाईल बा,
आपन बर्बादी के हाल सब एहि में कहाईल बा।।
...........

महँगी महँगी रटिया भइया

महँगी महँगी रटिया भइया महँगी महँगी रटिया।
सबै जगह अधिकार हौ एकर काशी हो या रशिया,
महँगी महँगी रटिया भइया महँगी महँगी रटिया।।
 
छोड़ऽऽ मन्दिर मस्जिद जाये नाहक जिन तु भटकिया,
रटते जइया सदा ए भइया कहीं न जिन तू अटकिया।
अगर से कोई जे तोहके छेड़े ओके तुरन्त झटकिया,
महँगी महँगी रटिया भइया महँगी महँगी रटिया।।
 
सोते जगते खाते पीते एकरा संग ही लिपटिया,
करिहऽऽ अब परचार एहि कऽऽ एहि के संग मटकिया।
सस्ती कहीं से ताक लगावे ओके तुरन्त पटकिया,
महँगी महँगी रटिया भइया महँगी महँगी रटिया।।
 
करला जहाँ विरोध ए भइया होईहे खूब पिटइया,
पड़ जाइ फाँसी औ जग में होइ नाम घिसइया।
सुख पइबा इहि में अब से इकरे नाम गटकिया,
महँगी महँगी रटिया भइया महँगी महँगी रटिया।।
 
अच्छाई जे मन में आवे मन ही मन में सटकिया,
उपदेशक जिन बनिहा कबहु राह न एकरे फटकिया।
भूल के आपन दीन धरम अब सबकर माल कपटिया,
महँगी महँगी रटिया भइया महँगी महँगी रटिया।।
..............

हमार सलाम बा

विश्व के सभै भाई बन्धुअन के हमार सलाम बा.
सबकर आपस के झगड़ा मिटावल हमार काम बा.

हिन्दु मुस्लिम सिख ईसाई सबके अपना पर गुमान बा.
इंसान कहइला कातिर वसुधैव कुटुम्बकम हमार मुकाम बा.

का पंडित का मौलवी अउर का फादर के ई मान बा?
पंचत्तव के मंदिर में सबकर अन्त समान बा.

काल करेब सो आज हौ कर लीं, अभयजी के इ कहनाम बा.
प्यार के खातिर समये नइके, फिर काहे के अभिमान बा
.............

बबुआजी हाईटेक भईलें

शहर में जाके गाँव के चोला उतार के दिहले फेंक
पढ़ लिख कर बबुआजी हमार, हो गइलें हाईटेक.

जवना धूल में बचपन बीतल, वोही धूल में वाइरस आइल.
बाबूजी का थिंकपैड में जेनरेशनगैप के साफ्टवेयर समाइल.
खेत सिवान का चर्चा से पहिले, आपन मेमोरी दिहलें फेंक.
पढ़ लिख कर बबुआजी हमार, हो गइलें हाईटेक.

संस्कारी दुलहिन के बदला लवमैरिज के विन्डो खोलाइल.
हमरा खातिर का कईलीं कह, बँटवारा के बनवलें फाइल.
हर रियेक्शन प एन्टीरियेक्शन के फार्मूला नाहीं कइले चेक,
पढ़ लिख कर बबुआजी हमार, हो गइलें हाईटेक.

देशी सिस्टम के गारी देके एनआरआई के पेनड्राइव बनाईल.
विदेशी रुपिया के सूद का खातिर देशी बैँक के मेल भेजाइल.
स्वार्थ के हार्डडिस्क में फुल मेमोरी पर स्वार्थ के रोटी दिहले सेंक
पढ़ लिख कर बबुआजी हमार, हो गइलें हाईटेक.
............

नया रूप में कबीर वाणी

आईं सबही कोई मिल के एगो अलख जगावल जाय..
नया रूप में कबीर वाणी दुनिया के बतलावल जाय..

साफ सफाई के नारा ले के जग में ढ़ोल बजावल जाय..
जहाँ जहाँ पर मइल देखाए ओकरा मार भगावल जाय..
नया रूप में......

हक के माँग से पहिले सबके कर्तव्य याद करावल जाय..
विदेशीयन के विरोध से पहिले आपन नंगई हटावल जाय..
नया रूप में......

वेलेंटाइन डे के विरोध सही बा पर ई बात बताईल जाय..
बर बारात में नारी के नाचल कइसे सही जताईल जाय..
नया रूप में......

जाति पाति खेल निराला एकरा के बन्द करावल जाय..
एक कहे तऽ नौकरी दुसरा के काहे जेल भेजावल जाय..
नया रूप में......

महँगाई भ्रष्टाचार के आड़ में राजा के गरियावल जाय..
एकरा आड़ में खून चुसे वाला के काहे जोंक बनावल जाय..
नया रूप में......

आईं सबही कोई मिल के एगो अलख जगावल जाय..
नया रूप में कबीर वाणी दुनिया के बतलावल जाय..
............

केहू जल के बुझाला केहू....

हमरा कहला में भी एगो बात बा..
मानी ना मानी दुनिया एगो बिसात बा..
हमार खुशी देख के उनकर जियरा जरात बा..
उनकरा का मालूम कि हमार का का पिरात बा.
इधर दिन निकलेला उधर रात के अंधियारी.
उनकर बेवफाई पर हमार कलेजा तारतार होला.
दिया और फतिंगा में फर्क बा सिर्फ इतना..
केहू जल के बुझाला केहू बूझ के जराला..
.............

रिमझिम पड़ेला फुहार

रिमझिम पड़ेला फुहार हो देहियाँ में आग लगाये.
कइसे बचाई आपन जान हो देहियाँ में आग लगाये.

जबसे बलम जी परदेश गइलन, हमारे जियरवा के सुधि नाही लिहलन.
सासु जी के बोलिया में आग हो देहियाँ के आग लगाये..
रिमझिम पड़ेला फुहार हो...........

करेजवा के चीर जाला सहेलियन के बोलिया जरको ना सहाला उनकर ठिठोलिया
कइसे बुझाई आपन प्यास हो देहियाँ में आग लगाये.
रिमझिम पड़ेला फुहार हो...........

भेजतानी संदेसा हम अपना जूनून से सियाही ना समझीय लिखातानी खून से..
जियरा में नाही बाचल आस हो देहियाँ में आग लगाये.
रिमझिम पड़ेला फुहार हो...........

रिमझिम पड़ेला फुहार हो देहियाँ में आग लगाये..
कइसे बचाई आपन जान हो देहियाँ में आग लगाये.
...............
 

वारिस खातिर लइका चाहीं

वारिस खातिर लइका चाहीं मचल बा हाहाकार.
कोखी से ही लइकी साथे हो रहल बा भेदाचार.
हो रहल बा भेदाचार कि सुन लीं लइकन के करनी.
एगुड़े कोठरी में पेटवा काट के चार चार के पलनी.
कहे अभय कविराय कि अब आईल बा जमाना.
चार चार कोठरी के किला में भी ना माँ बाप के ठिकाना.
बोई ब पेड़ बबूल के त आम कान्हा से पई ब.
मार के लइकी के तू लइका कहाँ ले जई ब.
............

कलयुग के फेरा में भईया

कलयुग के फेरा में भईया सगरे जहर बुताइल बा.
कइसे बताईं पापी देहियाँ कहाँ कहाँ अझुराइल बा..

हमके पाले में बाबू के का का कष्ट झेलाईल बा..
पढ़ लिख के सबसे पहिले ही उनके लात मराईल बा.
कइसे बताईं पापी देहियाँ........

एगो कमरा में चार चार के पलले एमा उनकर बड़ाई बा.
हमरा चार चार कमरा में भी उनकर नही समाई बा..
कइसे बताईं पापी देहियाँ........

उनकर दौलत हमार दौलत हमार त हमरे कहाइल बा.
मेहरारू के अईते भईया घर के चुल्हा बटाईल बा..
कइसे बताईं पापी देहियाँ........

वइसे ई बुराई में भी एगो सकारात्मक सोच देखाईल बा..
का गरीब अउर का अमीर सब एकही राग चिल्लाईल बा..
कइसे बताईं पापी देहियाँ........

ई कहनी त घर घर के बाटे बाहर भी त रास रचाईल बा..
कामकाज में तरक्की खातिर मेहरारू पर दाँव लगाईल बा..
कइसे बताईं पापी देहियाँ........

मानतानी ई खेला में केहु केहु ही जोताईल बा
पर अइसन मौका भी भईया सबके कहाँ भेटाईल बा..
कइसे बताईं पापी देहियाँ........

प्यार मोहब्बत के खेला में मेहरारू के अदला बदली होखाईल बा..
जो खेले ऊ मॉडर्न बकिया के बैकवर्ड के तमगा दिलाईल बा.
कइसे बताईं पापी देहियाँ........

कलयुग के फेरा में भईया सगरे जहर बुताइल बा.
कइसे बताईं पापी देहियाँ कहाँ कहाँ अझुराइल बा..
............
 

पान खियाइके लूट लिहल हमके..

पान खियाइके लूट लिहल हमके..
कहे करेजवा तान के..
ए गोरिया रपट लिखा दऽ हमार..
अरे ए गोरिया रपट लिखा द हमार..

रपट लिखावे थाने गईलीं..
निकलल थानेदार हो..
जरा ईऽ तऽ कहा..
रपट लिखाईं कहाँ..
अरे ए थानेदार रपट लिखाईं कहाँ..
खुल के बता दऽ ओ रसिया..
रपट लिखाईं कहाँ..

जालिम जवानी दुश्मन हो गईल..
हो गईल अपना जान के..
जरा ईऽ तऽ कहा..
रपट लिखाईं कहाँ..

बरसेला बदरा भींगेला देहियाँ..
देखेला कनछी मार के
जरा ई त कहा..
रपट लिखाईं कहाँ..

पान खियाइके लूट लिहल हमके..
कहे करेजवा तान के..
ए गोरिया रपट लिखा दऽ हमार..
अरे ए गोरिया रपट लिखा द हमार..
...............

ना चहला पर भी जिन्दगी नरक बन जाई.

ना चहला पर भी जिन्दगी नरक बन जाई.
ईऽ आपन दिल हव जइसन चाहेब हो जाई.

बुजुर्गन के नसीहत भुलाईब जिन्दगी फूँक हो जाई.
मेहरारु के बकबकाईल भी कोयल के कूक हो जाई.
जिन्दगी रहे खातिर खाईब दू रोटी में पेट भर जाई.
किसमतिया के कोसत रहब तऽ अबरो खेत चर जाई.
ना चहला पर भी.

दूर के ढ़ोल सुहावन सोचब जिन्दगी खुशगवार हो जाई.
आसमान पर थुकला से खुद पर पलटवार हो जाई.
जोर जोर चिल्लइला से झूठ, साँच ना हो जाई.
समय अइला पर बरगद भी खाक में मिल जाई.
ना चहला पर भी.

दुसरा के गरिऔला से कुछुओ ना मिल जाई.
कुआँ पर गईला से सब प्यास मिट पाई.
हम ही हम बानी सोचब जिन्दगी उजड़ जाई.
एक बार मर के तऽ देखीं स्वरग मिल जाई.
ना चहला पर भी.

ना चहला पर भी जिन्दगी नरक बन जाई.
ईऽ आपन दिल हव जइसन चाहेब हो जाई.
..................

अभय जी के ई सब रचना पुरनका अंजोरिया पर बरीस 2010 से पहिले अंजोर भइल रहली सँ. अबहीं बहुते रचना बाकी बा. गँवे-गँवे जोड़ा पाई. आवत रहीं.

अभय त्रिपाठी जी के कविता संग्रह - पहिला खण्ड

अभय त्रिपाठी

बनारस, उत्तर प्रदेश

त का करीं ?

चहलीं तऽ बहुत कि खुश रहीँ हम,
लेकिन दिल ही दगा दे गइल त का करीं ?
लगावे चलनी खूबसूरत बाग.
लेकिन माली ही उजाड़ दिहलसि तऽ हम का करीं ?
वक्त के आँधी बड़ा बेदर्दी बा,
जब नाखुदा ही डूबा दे तऽ हम का करीं ?
दिल तऽ आखिर दिल ही बा,
जब टूट ही गइल तऽ हम का करीं ?
----------------------------- 

सबसे बड़ा रुपइया

रिश्ता नाता भूल गइल सब, रुपया अपरमपार,
रुपया अपरमपार, कमाये जब हम गईऽलीं,
धरम करम सब भूल के भइया, बन गइलीं सरकार,
बन गइलीं सरकार, के सबकर भाई कहइलीं,
रुपया के फेरा में, आपन दीन ईमान गवइलीं,
कहै अभय कविराय कि जग के एक ही मइया,
दि होल थिंग इज दैट कि भइया सबसे बड़ा रुपइया.
------------------------

डोले बसन्ती बयार

डोले बसन्ती बयार मगन मन होला हमार।

गेहुँआ ‍‍‍‍‍‍‍मँटरिया से लहरल सिवनवा,
होखे निहाल भइया सगरो किसनवा.
धरती के बाढ़ल श्रृंगार, मगन मन होला हमार।।

डोले बसन्ती बयार मगन मन होला हमार।

बिहँसेला फुलवा, महकेला क्यारी,
ताक झाँक भँवरा लगावे फुलवारी.
मौसम में आइल बहार, मगन मन होला हमार।।

डोले बसन्ती बयार मगन मन होला हमार।

आईल कोयलिया अमवाँ के डरिया,
पीयर चुनरिया पहिरे सवरियाँ
सोहेला पनघट किनार, मगन मन होला हमार।।

डोले बसन्ती बयार मगन मन होला हमार।
------------

आजा आजा ए भोला हमार नगरी

आजा आजा ए भोला हमार नगरी,
तोहरा भंगिया खियाईब भरी गगरी।।

पाप पुण्य के हाट लगल बा,
केहु राजा केहु रंक बनल बा।
नाही चाही एमा हमके तऽ कइनो गठरी
आजा आजा ए भोला हमार नगरी....।।

सच्चाई दम तोड़ रहल बा,
झूठ के डमरू बाज रहल बा।
आऽईल कलजुग के घनघोर बदरी,
आजा आजा ए भोला हमार नगरी.....।।

लोक लाज सब छूट गईल बा,
भ्रष्टाचार के अलख जगल बा।
नाही अईब तऽ लुट जाई काशी नगरी,
आजा आजा ए भोला हमार नगरी...।।

दर्शन दुर्लभ ताज भईल बा,
सरकारी कारागार भईल बा।
नाही जईबे हम कबहु तोहार डगरी,
आजा आजा ए भोला हमार नगरी...।।

आजा आजा ए भोला हमार नगरी,
तोहरा भंगिया खियाईब भरी गगरी।।
-------------

वाह रे करम वाह रे धरम

मोह माया के त्याग के भईया ले लिहले सन्यास,
लेकिन जियरा ललचे लागल तोड़ दिहले बनवास।
तोड़ दिहले बनवास बन गईले सबकर नेता प्यारा,
ले आईब राम राज कऽऽ दिहले जग मे नारा।
राम राज तऽऽ आईल नाही लेकिन जब ऊऽ गईले जेल,
मचा दिहले पूरे समाज में हिंसा के ठेलम ठेल।
कहे अभय कविराय कि भईया मत कर अईसन जुरम,
अति भईला पर सब चिल्लाई वाह रे करम वाह रे धरम।।
------------

जानवरन के मीटिंग

जानवरन के मीटिंग में भइया बस इहे मुद्दा उभर के आईल बा,
घर लुटईला के बाद हमनी के करम भी इंसानन में बटाईल बा।
सबकर दुखड़ा सुन के राजा शेर के आँख में पानी भर आईल बा,
कइल जाई जाँच होखी हक खातिर महासंग्राम के बिगुल बजाईल बा।।
जानवरन के मीटिंग में.................।।

सबका सहमति से एगो संविधान पर अंतिम मुहर लगाईल बा,
सबसे पहिला हमार दुखड़ा के राग ढ़ेचुँ ढ़ेचुँ में गवाईल बा।
बाल मजदूरी अऊर श्रमिक उत्पीड़न में हमार हक दबाईल बा,
ई सुनते ही घोड़ा खच्चर ऊँट के राग भी एहि में समाईल बा।।
जानवरन के मीटिंग में.................।।

लोमड़ी मौसी के हाल तऽ अऊरो बदतर बा के ओरहना आईल बा,
दुसरा के माल पर आपन पेट भरे कऽ हक नेतवन में बटाईल बा।
नेताजी के चर्चा सुनते ही गिरगिटिया लोगन के रंग भी बदलाईल बा,
उनकर रंग बदले कऽ एस्क्लुसिव अधिकार भी नेता लोग चुराईल बा।।
जानवरन के मीटिंग में.................।।

भाई से भाई लड़त देख कुकुरन के जात भी शरम से पनियाईल बा,
पतनशील समाज में इंसान के दरिंन्दगी से जानवर भी शरमाईल बा।
जहर उगीले के सर्प राज के महारथ पर भी पूरा पानी फेराईल बा,
नारी के कमसिन जीवन में नारी के जरिये ही जहर घोलाईल बा।।
जानवरन के मीटिंग में.................।।

इहे हाल रही तऽ हमार का होखी के नारा से पूरा हाल थर्राईल बा,
सबसे बुरा हाल के रोना त़ऽ भईया खुद राजा शेर से ही रोआईल बा।
बड़ बड़ हथियार से लैस चूहा जइसन आदमी के रक्षक शेर कहाईल बा,
राजा शेर के दुखड़ा सुन सब जानवरन के आँख में पानी भर आईल बा।।
जानवरन के मीटिंग में.................।।
---------------

याद आवेला

अमवा के पेड़वा पर झुलुआ झुलैया के याद आवेला,
गरमी के दिनवा में नानी के गऊँआ के याद आवेला।।

धूल भरल ट्रेफिक में गऊँआ के टमटम के याद आवेला,
आफिस के खिचखिच में मस्ती भरल दिनवा के याद आवेला।
दोस्तन के झूठिया देख माई से झूठिया बोलल याद आवेला,
प्रदूषण भरल पनिया देख तलवा तलैया के याद आवेला।।
गरमी के दिनवा में.......।।

ब्रेड बटर के देखत ही मकुनी अऊर चोखा के याद आवेला,
कोल्ड ड्रिंक के केलोरी में छाछ और पन्ना के याद आवेला।
फास्ट फूडन के दुनिया में सतुआ-चबेना के याद आवेला,
अश्लील भईल सिनेमा से कठपुतली के नचवा के याद आवेला।।
गरमी के दिनवा में.......।।

बीबी के होटल बाजी से माई के खनवा के याद आवेला,
मतलबी पटीदारन में जानवर के वफादारी के ञाद आवेला।
दारुबाजन के हुड़दंगई में भंगिया के मस्ती के याद आवेला,
पुलिसियन के रौब देख रावण अहिरावण के याद आवेला।।
गरमी के दिनवा में.......।।

भ्रष्टाचारी के मनसा देख सुरसा के मुँहवा के याद आवेला,
नेताजी के करनी से गिरगिटया के रंग बदलल याद आवेला।
बेईमान भरल दुनिया में आपन बेईमानी के याद आवेला,
ना होए पुनर्जन्म अब तऽ बस अंतिम समइया के याद आवेला।।
गरमी के दिनवा में.......।।

अमवा के पेड़वा पर झुलुआ झुलैया के याद आवेला,
गरमी के दिनवा में नानी के गऊँआ के याद आवेला।।
--------------

परलय काल

माया के फेरा में प्रानी, नित नित करे बवाल,
पुण्य धरम सब भूल गईल बा, पापी हो गईल काल।
पापी हो गईल काल, काल में बचल बा एक सवाल,
सवाल यहि अब आगे का बा, कइसे सुधरी ईऽ मायाजाल।
कहे अभय कविराय कि अब तऽ हो गईल जी के जंजाल,
करम जुटाईं आपन सबे कोई, अब तऽ आई परलय काल।।
--------------

जिनगी सयान हो गईल

जिनगी सयान हो गईल जीना मोहाल हो गईल.......

रक्षक ही भक्षक बा अब तऽ कहना ईऽ जंजाल हो गईल,
परिवर्तन युग के नारा बा पर हमरा संग बवाल हो गईल।
कहलीं जब जुरमी के लेखा जिनगी एक सवाल हो गईल,
प्रेम प्यार के पाठ पढ़ावल सबसे बड़ा कमाल हो गईल ।।
जिनगी सयान हो गईल....................

आपन स्वारथ मिटावे खातिर अभिनेता किसान हो गईल,
संयासिन के ठाठ के आगे राजा रंक समान हो गईल।
माई बाबू के बदला अब कुकुर घुमावल आसान हो गईल,
भ्रष्टाचार के वैशाखी ले के मेरा भारत महान हो गईल।।
जिनगी सयान हो गईल....................

बाप न मारे मेंढ़की अऊर बेटा तीरंदाज हो गईल,
संस्कारी लोगन के आगे मुजरिम प्रधान समाज हो गईल।
जुरम करत पकड़ाते नेताजी के तबीयत नासाज हो गईल,
देखलवनी जब दुनिया के ऐना सब केहु नाराज हो गईल।।
जिनगी सयान हो गईल....................

जिनगी सयान हो गईल जीना मोहाल हो गईल.......
--------------

कलयुगी माया के महिमा

कलयुगी माया के महिमा से सारी दुनिया दबाईल बा,
का ज्ञानी का अज्ञानी सब एहि माया में अझुराईल बा।
पढ़ब लिखब होखब नवाब कऽ नारा दुनिया से भुलाईल बा,
अब तऽ गोली तमंचा में ही दुनिया के अर्थ समाईल बा।
कलयुगी माया के महिमा.........

नेहरु गाँधी के आदर्श के नारा शिक्षक ही भुलाईल बा,
डाकू गु्ण्डन के सम्मान के खातिर विद्यापीठ अघाईल बा।
जेकर कउनो मान ही नइखे ओकरे मान मनाईल बा,
रिश्वत खाके भी नेताजी के बत्तीसा खीस निपोराईल बा।
कलयुगी माया के महिमा.........

प्रेम प्यार के फेरा में अब तऽ बिटिया से आँख लड़ाइल बा,
सजनी खातिर माई काटत जरको ना लोर चुआईल बा।
ईऽ कहनी तऽ अइसन बाटे खुद के आँख देखाईल बा,
का सोचीं हम एकरा आगे जब एहि से मनवा पटाईल बा।
कलयुगी माया के महिमा.........

अईसन भी नईखे बबुआ लोगिन दुनिया से प्रेम मिटाईल बा,
विध्वसं के बाद निर्माण भी होखी ई सपना देखाईल बा।
पूछब ऊपर नारायण से कि ई खेल से केकर दिल बहलाईल बा,
बन्द कर दीं अब कलयुग के खेला रऊए नाक कटाइल बा।।
कलयुगी माया के महिमा.........
--------------

कुर्सी के महिमा

कुर्सी के महिमा ए भईया देखाऽ जबरदस्त,
जे पाये ऊ मस्त हो रामा जे ना पाये त्रस्त..

सबसे पहिले बुढ़वा कुर्सी कहलाए ऊऽ प्रेसीडेन्ट,
बुढ़वन खातिर फिक्स ए भईया एकर एग्रीमेन्ट.
ना कउनो विवाद भईल बा ना बदनामी के चर्चा,
नम्बर वन के कुर्सी ईऽ बा जाने बऽच्चा बऽच्चा.
ई कुर्सी के छोड़ के बाकी कुर्सी बाऽ मदमस्त,
जे पाये ऊ मस्त हो रामा जे ना पाये त्रस्त..

पीएम सीएम सांसद भईया जाने सब कुर्सी के महिमा,
कुर्सी के पावे खातिर ख्याल न रऽखे कउनो गरिमा.
प्रजातन्त्र के नारा दे के कुर्सी के दू फाड़ कईऽल बा,
का साधू का मुजरिम भईया सबकर इऽहै जात बनल बा.
सत्ता के कुर्सी के खातिर मुजरिम बन गईऽल सरपरस्त,
जे पाये ऊ मस्त हो रामा जे ना पाये त्रस्त..

कबहु रहऽल इन्द्र के कुर्सी बात बात पर डोले लागे,
जान जाये पर कुर्सी ना देब उनकर मनवा बोले लागे.
हमके तऽ ईऽ लागत भईया आपन आफत थोपे खातिर,
पृथ्वीलोक के रोग के पीछे देवलोक के ईऽ चाल बा शातिर.
अब ना डोले इन्द्र के कुर्सी षड़यन्त्र हो गईऽल जबरदस्त.
जे पाये ऊ मस्त हो रामा जे ना पाये त्रस्त..

कुर्सी के महिमा ए भईया देखाऽ जबरदस्त,
जे पाये ऊ मस्त हो रामा जे ना पाये त्रस्त..
---------- 

बाबू हमार बियाह कईऽले

हमार अज्ञान मिटावे खातिर बाबू हमार बियाह कईऽले,
ज्ञान के चक्षु खुलते भईया हमरा लाइफ से बाहर गईऽले.

माई के सेवा हम कईऽलीं अऊऽर बाबू के गोड़ दबवलीं,
कबहुँ न ऊँचा बोली बोललीं ईऽ सब हम अज्ञान में कइऽलीं.
हमरा ज्ञान बढ़ावे खातिर बाबू एक प्रयोजन कईऽले,
सबकर राय मंत्रणा ले के हमरा खातिर लऽईकी देखले.
हमार अज्ञान मिटावे खातिर बाबू हमार बियाह कईऽले.

पत्नी आईल सुन्दर गोरी हमके बहुत बहुत ही भाईऽल,
हमरा ज्ञान के सीमा जनले मन ही मन बहुत पछताईऽल.
लोक लाज के शरम में आके पहिले तऽ चुपचाप रह गईऽल,
ओकरा जरिये सरऊऽ फिर हमरा मन पैठ जऽमईऽले.
हमार अज्ञान मिटावे खातिर बाबू हमार बियाह कईऽले.

मेहरारु के रंग में आके हमरे ज्ञान के चक्षु खुल गईऽल,
माई बाबू गौड़ भये अऊर मेहरारु सर्वोपरि हो गईऽल.
माई के सेवा के बदले मेहरारु कऽऽ नशा छा गईऽल,
सरऊ के चक्कर में आके बाबु अपना गोड़ से गईऽले.
हमार अज्ञान मिटावे खातिर बाबू हमार बियाह कईऽले.

माई बाबू से छुट्टी खातिर जल्दी से सब बियाह कऽईले,
का रखल बा माई बाबू में पत्नी के सम्पूर्ण समझऽले.
पीछे की छोड़ आगे की सुध ले नारा ई मन में तू जमईऽले,
बिटवा कबहु न पैदा करिऽहे वरना तू भी काम से गईऽले.
हमार अज्ञान मिटावे खातिर बाबू हमार बियाह कईऽले.
--------------

मनवा तू चुपचाप ही रहिऽह

ना कुछ कहिऽह ना कुछ बोलिऽह मनवा तू चुपचाप ही रहिऽह.

सबके फिकर बा आपन आपन न्याय भईल अब सपना भईया,
गाँधी के सिद्धान्त गईल बा हिंसा ईंहा के राज भईल बा.
देख के ईऽ सब आँख ही मुदिंऽह मनवा तू चुपचाप ही रहिऽह.

भारत माता रोअत बाड़ी कोख के अपना कोसत बाड़ी,
इक दुसरे के रोजी झपटल अन्याय के रथ पर भटकल.
दिल ही दिल में तू रखिऽह मनवा तू चुपचाप ही रहिऽह.

अपने से दूबर के पटकल शान देखावत कभी ना अटकल,
मार काट तऽ अइसे कईऽलस इंतहान के परचा दिहलस.
करम के अपना तू रोईऽह मनवा तू चुपचाप ही रहिऽह.

ना कुछ कहिऽह ना कुछ बोलिऽह मनवा तू चुपचाप ही रहिऽह.
--------------

बचवन देश गँवइऽऽह मत

बचवन देश गँवईऽऽह मत दुश्मन से घबड़ईऽऽह मत.

सब देशन से भारत अच्छा जेकर करे हिमालय रक्षा,
सागर करेला एकर रखवारी ललचाएला दुनिया सारी.
एके तू बिसरईऽऽह मत बचवन देश गँवईऽऽह मत.

इहँवे भइलन कृष्ण कन्हैया आज भी बाटे गोकुल गइया,
इहँवे पर राम अवतरले जे रावण के मान घटवले.
इनके कलंक लगइऽऽह मत बचवन देश गँवईऽऽह मत.

अनेक योद्धा अनेक त्यागी अनेक योगी अऊर बैरागी,
परोपकारी अनेक दानी जेकर इहँवे बाऽऽ निशानी.
इनसे मुहँ चोरईऽऽह मत बचवन देश गँवईऽऽह मत.

जिम्मेदारी अब तोहार बा भारत माता के पुकार बा,
दुश्मन चारो ओर अड़ल बा भारत भेदियन से भरल बा.
इनसे तनिक डेरईऽऽह मत बचवन देश गँवईऽऽह मत.

कपट से कपटी पाकी अइलस खाके मात लजाई गईलस,
भुट्टो के तऽ यादे होई ढाका में जे गुजरल होई.
आपन शान घटईऽऽह मत बचवन देश गँवईऽऽह मत.

आज नीति डाँवाडोल बा स्वार्थ रूपी विष घोलल बा,
तबाही के पीड़ा भईया भोगे तोहार बाबा मइऽऽया.
तूऽऽ एके अपनईऽऽ मत बचवन देश गँवईऽऽह मत.

बड़कन के कुछ गलती होई बबुअन माख न रखिऽह कोई,
जैसे खाके आम के गुदा गुठली कर दिहल जाव जुदा.
सच्चाई झूठलईऽऽह मत बचवन देश गँवईऽऽह मत.

बचवन देश गँवईऽऽह मत दुश्मन से घबड़ईऽऽह मत.
----------

धन्य धन्य काशी कीऽ नगरी

धन्य धन्य काशी कीऽ नगरी पावन गंगा के पानी
जेकरा दर्शन के तरसे जग के सगरो प्राणी प्राणी.

मूरख पंडित साधू अऊर ग्यानी राजा रंक अऊर अभिमानी,
केहु नाही बा अइसन भईया जे काशीके महिमा ना जानी.
पाप से मुक्ति पावे खातिर हर केहु आवेला काशी,
उनके बाऽ विश्वास कि जालन स्वर्ग में काशी के बाशी.
धन्य धन्य काशी कीऽ नगरी पावन गंगा के पानी.

काशी के महिमा कारण ग्रहन में आला अईसन भीर,
तिल धरे भर के जगह नाऽ बाचल गंगाजी के तीर.
बुढ़ा बच्चा अऊर जवान भेद भाव के छोड़ निशान,
दौड़ लगावे अइसे जइसे मिल गइले इनके भगवान .
धन्य धन्य काशी कीऽ नगरी पावन गंगा के पानी .

भीड़ भी लऽउके अइसन जइसे बाढ़ के उमड़ल पानी,
सच्ची सेवा के भावना में भूल गइल सब कुछ प्रानी.
नैया गंगाजी में दौड़ल लेके यात्री जन के पूरा भार,
जनसेवक उनके सेवा खातिर हरदम बा पूरा तैयार .
धन्य धन्य काशी कीऽ नगरी पावन गंगा के पानी.

घाट घाट पर शोर मचल सुन लीं साधू संतन के बोली,
दान धरम के महिमा सुना के उनकर भर गइल झोली.
गंगा किनारे और सड़क पर लागल ड्यूटि पुलिस के भाई,
इधर से आके उधर से जा जा जनता के बा रहल समझाई .
धन्य धन्य काशी कीऽ नगरी पावन गंगा के पानी .
--------------

माई रे हम जेल जाइब

माई रे हम जेल जाइब कुछ अउर नाही तऽ नेता ही बन जाइब,
माई रे हम जेल जाइब.

बचपन में हम ध्यान ना दिहिलीं एक से बढ़के खेला हम कइलीं,
कसम खिया ले हमसे माई ईऽ गलती अब ना दोहराईब.
माई रे हम जेल जाइब.

पढ़ली लिखिलीं बीए पास केहु ना डललस हमके घास,
का करेब हम नौकरी करके ऐकौ धेला बचा ना पाइब.
माई रे हम जेल जाइब.

बाबू कहले धन्धा कइलीं सब चिजीया में मिलावट कइलीं,
हमरो भी ईमान धरम बा इहै बात तोहके समझाइब.
माई रे हम जेल जाइब.

नेता बनके नाम कमाइऽब नाम कमाइब दाम कमाइऽब,
जे ना मानी हमरा बात हम ओके मिट्टी में मिलाइब.
माई रे हम जेल जाइब.
--------------

कलयुग के नेता.

जय कलयुग के नेता भ्राता, भ्रष्टाचार के तुम हो दाता.

जे तोहरी जी हुजुरी बजावे, सुख सुविधा वो सब कुछ पावे,
चोर गद्दार के तू रखवाला मिल भारत के करें दिवाला.
जय कलयुग के नेता भ्राता, भ्रष्टाचार के तुम हो दाता.

जेकरे द्वारे तू चला जावे धन्य धन्य ऊऽऽ जन कहलाई,
खद्दर से तन आपन सजाके कहलइल तू गाँधी के भाई.
जय कलयुग के नेता भ्राता, भ्रष्टाचार के तुम हो दाता.

जे तोहके धन पहुँचवलस लक्ष्मी ओकरे घर में गइलस,
जब आवे चुनाव के बारी पैदल चले लऽऽ छोड़ सवारी.
जय कलयुग के नेता भ्राता, भ्रष्टाचार के तुम हो दाता.

हाथ जोड़ के तु बतियाऽव मुरख जनता के फुसलाऽऽव,
जीत इलेक्शन घर तू बइऽऽठ बड़ ताव से मूँछ तू ऐंठऽ.
आपन तोहरे बाटे चिन्ता जय कलयुग के नेता भ्राता.

जय कलयुग के नेता भ्राता, भ्रष्टाचार के तुम हो दाता.
--------------

मिलावट

मिलावट के मारे सबही के नाक में दम आइल बा,
केकरा केकरा के कहिं एमा सबहीं अझुराइल बा.

बात मे मिलावट विचार मे मिलावट
चाल में मिलावट खाल में मिलावट,
पोशाक में मिलावट के झण्डा फहराइल बा
केकरा केकरा के कहिं........

काम में मिलावट ध्यान में मिलावट
पति में मिलावट पत्नी में मिलावट,
मिलावट के भाई बहिन से सिनेमा होटल फुलाइल बा
केकरा केकरा के कहिं........

तौल में मिलावट कौल में मिलावट
चावल में मिलावट दाल में मिलावट,
आटा में मिलावट से दाँत किरकिराइल बा
केकरा केकरा के कहिं........

शक्क्कर में मिलावट शहद में मिलावट
मख्खन में मिलावट डालडा में मिलावट,
तेल में मिलावट से बाल अझुराइल बा
केकरा केकरा के कहिं........

कथनी में मिलावट करनी में मिलावट
घी में मिलावट और साग में मिलावट,
दवाई में मिलावट से मनुष्यता लजाइल बा
केकरा केकरा के कहिं........

कान में तेल डालके अधिकारी लोग बहिराईल बा,
थोड़ा बहुत खाके अपना कर्तव्य से भुलाइल बा.
कऊनो अइसन चीज नइखे जवन शुद्ध कहलाइल बा,
अगर कुछ शुद्ध बा त विदेश से मँगाइल बा.
रोवतारी भारत माता शुद्धता लुकाइल बा,
सरग जइसन देश आपन नरक में ढ़केलाइल बा.
पढ़के नाराज मत होखब सभै दुख से लिखाइल बा,
एक आदमी के कहात नइखे सबकर उगलाइल बा.
केकरा केकरा के कहिं........
--------------

इन्द्र कऽ कुर्सी फिर से डोलल.

स्वर्ग में मचल बा हाहाकार सब केहु हो जा खबरदार,
का भईल कऽऽ शोर बा मचल इन्द्र कऽ कुर्सी फिर से डोलल.

का देवी देवता अऊर का देव गुरु सबही बा घबराईल
सबकर एक ही मंत्रणा आखिर ई आफत कहाँ से आइल,
केहु कऽ भी दिमाग नाही चलल इन्द्र कऽ कुर्सी फिर से डोलल.

काऽ होइ काऽ होइ के बीच यमराज कऽ इक दूत आइल
साथ में इक मृतआत्मा के देख सबकर दिमाग चकराईल,
सब देखे लागल एक दुसरा कऽऽ शकल इन्द्र कऽ कुर्सी फिर से डोलल.

बाअदब बामुलाहिजा़ होशियार कहके यमदूत सुनवले यम संदेश
एकरा चक्कर में नर्क में आइल आफत एहिसे ब्रह्माजी दिहले आदेश,
स्वर्ग में ही सत्ता कऽ हो सकेला बदल इन्द्र कऽ कुर्सी फिर से डोलल.

सत्ता के लालची नेता के देख ऊँहा मच गईल तहलका
अइसन स्थिति फिर ना आवे कोई उपाय करे के होई पक्का,
नया नियम के सिवा रास्ता ना बचल इन्द्र कऽ कुर्सी फिर से डोलल.

स्वर्ग और नर्क में कउनो भी नेता कऽ आवागमन हो गइल निषेध
अब मरते ही तुरन्त पुनर्जन्म देबे कऽ पारित हो गइल आदेश,
ना रहिहैं साँप ना होई लाठी कऽ दखल इन्द्र कऽ कुर्सी फिर से डोलल.
--------------

सुखवा सपना भइल बा

सुखवा सपना भइल बा, ना जाने कँहवा गइल बा.

आडम्बर के मंच लगल बा, हाहाकार भाषण बनल बा.
शान्ति हो गइल उद्विग्न बा, धैर्य संतोष में आइल विध्न बा.
सुखवा सपना भइल बा, ना जाने कँहवा गइल बा.

सांत्वना सहानुभूति के बजर पडल बा, मिथ्या उपहास के तूती बा.
भरसाईं में जरल लाज शरम बा, फुहडता निर्लज्जता भइल धरम बा.
सुखवा सपना भइल बा, ना जाने कँहवा गइल बा.

छप्पर फार के बरसत कलेश बा, शिक्षा संस्कार के गिरल स्तर बा.
भालू बन्दर से वेत्ता लोग बदतर बा, यजिगर काया के सख्त अभाव बा.
सुखवा सपना भइल बा, ना जाने कँहवा गइल बा.

क्षुद्रता लालच के लगल आसन बा, भ्रष्टाचार करत शासन बा.
आदर सम्मान के लागल गोली बा, लड़का लोग बाबू के फोड़त माथा बा.
सुखवा सपना भइल बा, ना जाने कँहवा गइल बा.
--------------

आयल मधुमास कोयलिया बोले

आयल मधुमास कोयलिया बोले .

लाल लाल सेमरु पलास बन फूले
सुमनो की क्यारी में भँवरा मन डोले,
किसलय किशोरी डारन संङ झूले
महुआ मगन हो गन्ध द्वार खोले.

आयल मधुमास कोयलिया बोले .

सुगन्धित पवन भइ चलल होले होले
ढोलक मंजिरा से गूँजल घर टोले,
रंग पिचकारी मिल करत किकोले
छनि छनि भंग सब बनल बमभोले.

आयल मधुमास कोयलिया बोले .

उड्ल गुलाल लाल भर भर झोले
मीत के एहसास बढल मन के हिडोले,
धरती आकाश सगरे प्रेम रस घोले
मख्खियन के झुण्ड पराग के टटोले.

आयल मधुमास कोयलिया बोले .
--------------

पतई पर परान बा

पतई पर परान बा
सांसत में जान बा
मिथ्या जबान बा
धोका सम्मान बा
दौरी भर शान बा
शिक्षा शैतान बा
टुटहा अरमान बा
नाहक वरदान बा
ढोंगी महान बा
पीडा आसान बा
कौआ लेले कान बा
भेडिया धसान बा
मरयादा शमशान बा
सिर धुनत मान बा
दम तोडत ब्रतमान बा
केहु के न भान बा. 

----------------

अभय जी के ई सब रचना पुरनका अंजोरिया पर बरीस 2010 से पहिले अंजोर भइल रहली सँ. अबहीं बहुते रचना बाकी बा. गँवे-गँवे जोड़ा पाई. आवत रहीं.

चुसाइल वोटर आ बुताईल बलब

चुसाइल वोटर आ बुताईल बलब

आलोक पुराणिक

चुनावी गतिविधियन पर कवि जालीदास रचित चुनाव प्रपंच नामक महाग्रंथ के कुछ महत्वपूर्ण छन्द अईसे बा :

वोटाणि, खोटाणि, भा वार्ता आफ हार्ड पोटाणि
तबहियों ना पिघलल वोटर, सिर पर पड़ल सोटाणि.
चालू वोटर आ टालू महबूबा के पूछऽ ना बात
केहू ना जान सकल, केहू ना बूझ पावल हे तात.

कहे के मतलब कवि जालीदास ई कवित्त खास तौर पर ओह कैंडीडेटन का दशा आ दिशा पर लिखले बाड़न जे चुनाव के रिजल्ट अईला का बाद पस्त होके पड़ल बाड़न.

चुनाव से पहिले वोट के बात कईनी, तरह तरह के खोट से रिझावे बझावे के कोशिश कइनी. पोटा लगावे के बात कइनी. बाकिर वोटर नाहिये नू पिघलल आ ओकर जवाब मूड़ी पर सोटा का तरह पड़ल बा. ज्ञानीजन कह गईल बाड़न कि दू गो समुझल बड़ामुश्किल होला, पहिला त चालू वोटर के आ दोसरे टालू महबूबा के जवन रोज टालेले प्रणय निवेदन के. साफ मनो ना करेले आ साफ हँओ ना करे ले.

अइसहीं वोटर बाड़े जे चुनाव का पहिले घर का आगा एगो पार्टी के झंडा लगा के कुछ दोसरे सन्देश देबेले बाकिर गरदन में दुपट्टा दोसरे पार्टी के पहिरले रहेले. वोट डाले घरी तीसरका पार्टी के वोट दे आवेले आ सभका से चउथका पार्टी के वोट देबे के बात करेलन सन.आ जब रिजल्ट आवेला त डांस करे जीते वाला पार्टी का दफ्तर चहुँप जाले.अइसनका चालू वोटर आ वइसनका टालू महबूबा के भाँपल केहू का बस में नईखे, मोरे बाप.

बदलल एहिजा के खेला,
मजनू ना पहिचाने लैला,
रोमियो का लगे चहुँपली जब जूलियट
जवाब मिलल चल हट, मुँहफट
वोटर के देख के लागल अईसे करेंट
जईसे कर्जखोर देखले होखे वसूली के एजेंट.

कहे के मतलब चुनाव का बाद खेला बदल गईल बा. मजनू लैलो के पहिचाने से इन्कार कर रहल बा. मजनू के इंटैंशन साफ बा कि अब चुनाव त हो चुकल आ लैला वोटर का तरह चूसा चुकली. अब उनुका के भाव काहे दिहल जाव. अईसहीं जब जूलियट रोमियो का लगे चहुँपली त बतावल गईल कि चलऽ हटऽ, चुनावी मौसम खतम हो चुकल. अब भाव मत खा. जवन नेता पहिले खंभा आ पेड़ो से वोट मांगत फिरत रहुवे अब वोटर देख के अईसे बिदकत बा जईसे कवनो कर्जखोर वसूली करे वाला एजेंट देख लिहले होखे.

मतलब कि दू गो प्रेमियन के प्रेम तूड़वावे के होखे त ओह में से एगो के नेता आ दोसरका के वोटर बना दिहल चाहीं. कुछ दिन बाद नेता प्रेमी वोटर प्रेमिका के चिन्हहूं से मुकर जाई. अकबर का टाईम में ई तरकीब मौजूद ना रहुवे, ना त अनारकली सलीम काण्ड बहुते ठीक ठाक निपट गईल रहित. सलीम के फतेहपुर सिकरी विधानसभा इलाका के कैंडिडेटे बना दिहल काफी रहित, फेर वोट पड़ गईला का बाद ऊ अनारकली के पहिचानहूं से इन्कार कर दित.

ज्ञानी जन कहत बाड़न कि चुनाव का बाद नेता पति पत्नियो के पहिचाने से मुकर जाव त अचरज नाहोखे के चाहीं. चुसाइल वोटर बुताईल बलब का माफिक होखेला,से ओकरा पर टाइम खोटी काहे करऽ.

---

आलोक पुराणिक जी हिन्दी के विख्यात लेखक व्यंगकार हईं. दिल्ली विश्वविद्यालय में वाणिज्य विभाग में प्राध्यापक हईं. ऊहाँ के रचना बहुते अखबारन में नियम से छपेला. अँजोरिया आभारी बिया कि आलोक जी अपना रचनन के भोजपुरी अनुवाद प्रकाशित करे के अनुमति अँजोरिया के दे दिहनी. बाकिर एह रचनन के हर तरह के अधिकार ऊहें लगे बा.

पुराणिक जी के ई रचना आ अउरिओ कई गो रचना बरीसन पहिले अंजोरिया पर प्रकाशित भइल रहली सँ. पुरनका अंजोरिया चूंकि वर्डप्रेस पर ना रहल से ओह पर के रचना गँवे गँवे एह ब्लॉग पर डालल जात बा. अबहियों एगो बड़हन भण्डार बाकी बा आवे से. एहसे रउरा से निहोरा बा कि बीच बीच में आवत रहीं आ नया रचनन ला अंजोरिया के वर्डप्रेस संस्करण पर जाइल करीं. 

डाकू होखे त अईसन

डाकू होखे त अईसन

आलोक पुराणिक

साहेबजी सोमालिया अब एगो ब्राण्ड हो गईल बा, गब्बर सिहं लेखा. अदन का खाड़ी से पचास पचास किलोमीटर दूर जब कवनो जहाज निकलेला त कैप्टन जहाज ड्राइवर से कहे ला, निकल ले बे, पांच सौ के स्पीड पे, नाहीँ त सोमालिया के डाकू आ जाई.

साँचहूं जवन इंटरनेशनल कवरेज बुश का हिस्सा में जात रहुवे, अब सोमालिया का डकैतन का हिस्सा में जाये लागल बा. सोचत बानी काहे ना सोमालिया का राजदूतावास में जा के अरज करीं कि सोमालिया डाकू टूरिज्म पैकेज चलावे. टूरिस्टन के ओह जगहा ले जाईल जहवाँ सोमालिया के डाकू डकैती डालेलन सन. छोटको बोट में कवनो खोट ना रही, बस डकैती होखे के गारण्टी रहे के चाहीं. बड़को शिप त धराइये जाले सन.

खैर मसला ई बा कि चिंता आ चिंतन के विषय ई बा कि सोमालिया में आखिर अतना समुद्री डाकू आ कहाँ से गईलन स. हमरा त बुझात बा कि सोमालिया के डाकू ब्राण्ड भँजावे खातिर कुछ दोसरो लोग अपना के सोमालिया के डाकू बतलावे लागल बा. अतना जहाज लुटात बाड़ी सन कि सोमालिया जईसन छोटहन देश के सगरी डाकू मिलियो के ना लूट पईहें. कतनो ओवर टाइम कर ल सन. करामात केहू दोसरे के बा. आ एह लपेटा में सोमालिया डाकू ब्राण्ड बन गईल बा.

सोमालिया के दू गो बंदन से एने भेंट भईल. ऊ परिचय दिहलें कि प्रोफेसर हउवन जा. एने के बंदा लोग भेंट करे से नकार दिहल. सोमालिया के भईलऽ आ डाकू ना भईलऽ त मिलला से फायदा का ? ई त कुछ वइसने हो गईल कि नेता बस्ती के भईलन आ तबहियों शरीफ हो गईलन. से भेंट कईला से फायदा का.

कुछ दिन में अब ई होखी कि लोकल फिरौतीबाज कहे लगीहें सन कि हम सोमालिया के फिरौतीबाज हईं, चुपचाप हतना करोड़ रुपया होह जगहा पर राख आवऽ. सोमालिया डाकू ब्राण्ड का सम्मान में बंदा बगैर चूं चपड़ कईले रकम राख आई. ब्राण्ड इमेज आउरि होला का जी.

सोमालिया तूँ त ग्रेट हउव जी. नाकी देशन में फिरोतीबाज होलन, बाकिर सोमालिया में त फिरौतीबाजन का लगे पूरा देशे बा.

खैर मसला ई बा कि आखिर सोमालिया डकैतन का रूप में काम के कर रहल बा. हमरा त सुबहा बा कि एने बहुते टेलीकाम मोबाइल प्लान बेंचे वाला सोमालिया जा के डाकू हो लिहल बाड़न सन. एहिजा त मंदी आ गईल बा. तरह तरह के टेरिफ प्लान बेंचे में दिक्कत आ रहल बा. ओहिजा समुन्दर में सुभहिता बा. कहाँ ठेलत फिरऽ एक ह एक गो प्लान, ओहिजा सोझे एगो जहाजे ठेल के ले जा. ना त ईहवाँ टेरिफ प्लान खरीदे वालन का बस में कुछ बा, ना ओहिजा जहाज वालन का हाथ में.

भा हो ना हो, सोमालिया के डाकू का वेश में ऊ सभ चलि गईल बाड़न सन जवन पहिले एहिजा बतलावत रहलन स कि युकिलिप्टस उगावऽ आ हतना साल में हतना रकम पावऽ. एहिजा वाला त धरपकड़ कर लेबेलन स कि ले आवऽ वापिस रकम. सोमालिया का समुन्दर में सुभीता बा.

चलऽतानी हमहूं सोमालिया के डाकूवन के फ्रेचाइजी ले लेत बानी, कवनो धंधा में आगा चल के कामे आ जाई.

---

पाटिल जी का सम्मान में

ई व्यंग्य ना हऽ.

आजु सिरिफ आ सिरिफ मौन बा, महान हास्यकार शिवराज पाटिल जी का सम्मान में.

पहिले आतंकवाद का मुकाबिला खातिर ऊ जे बलत रहलन ओह पर हँसी आवत रहुवे, फेर ऊ अपनहीं हास्यास्पद हो गईलन. आ अब त शर्मनाक हो गईल बाड़न. सगरी हास्यकारन के ओकनी का धंधा से बहरियावे में लागल पाटिल जी का सम्मान में आजु कुछवु ना.

उनुका सम्मान में प्लीज पांच मिनट के मौन राखीं.

---

आलोक पुराणिक जी हिन्दी के विख्यात लेखक व्यंगकार हईं. दिल्ली विश्वविद्यालय में वाणिज्य विभाग में प्राध्यापक हईं. ऊहाँ के रचना बहुते अखबारन में नियम से छपेला. अँजोरिया आभारी बिया कि आलोक जी अपना रचनन के भोजपुरी अनुवाद प्रकाशित करे के अनुमति अँजोरिया के दे दिहनी. बाकिर एह रचनन के हर तरह के अधिकार ऊहें लगे बा.

पुराणिक जी के ई रचना आ अउरिओ कई गो रचना बरीसन पहिले अंजोरिया पर प्रकाशित भइल रहली सँ. पुरनका अंजोरिया चूंकि वर्डप्रेस पर ना रहल से ओह पर के रचना गँवे गँवे एह ब्लॉग पर डालल जात बा. अबहियों एगो बड़हन भण्डार बाकी बा आवे से. एहसे रउरा से निहोरा बा कि बीच बीच में आवत रहीं आ नया रचनन ला अंजोरिया के वर्डप्रेस संस्करण पर जाइल करीं. 

ऊँट का मुँह में काजू

ऊँट का मुँह में काजू

आलोक पुराणिक

अबहीं ले जे लोग मल्लिका सहरावत भा राखी सावंतजी के अँगड़ाई पर फोकर करत रहुवे, हम खाली टीवीये चैनल के बात नईखी नू करत, अब उहो लोग ऊँट का करवट पर चिन्तित हो उठल बा.

मल्लिका जी से ऊँट पर आ गईल बा सौंदर्यबोध, थैंक्स टु चुनाव.

हम सोचनी काहे ना सोझे ऊँटे से बतिया लिहल जाव.

चहुँपनी त देखनी का ऊँट कवनो टीवी चैनल पर डांस के रियल्टी शो देखत रहुवे. कान्ह पर भाजपा के झण्डा रहुवे, ओकरा ऊपर कांग्रेस के झण्डा रहुवे. बसपो के झण्डा पीठ पर लिहले रहुवे.

हम पुछनीं, कवन करवट बईठबऽ ?

जवाब मिलल, हम त कबहिंयो ना पूछीं कि नेता कवना करवत बईठी.

देखिये नेतो से इंपोर्टेंट रउरा बानीं. सगरी जानवरन में रउरे करवट के महत्व बा. नेता के करवट आ बानर के करवट एके जईसन होला. केहू अंदाजे ना लगा सके कि उछल के मामिला कहवां ले चलि जाई. बाकिर रउरा से त ढेरे उम्मीद बा.

ऊँट एक तरफ झुके के कोशिश कईलस, फेर एके झटका में खड़ा हो गईल.

रउरा ओह करवट बईठे जात रहुंवीं, फेर खड़ा हो गईनी. फाइनल करीं ना.

ऊँट हँसे लागल आ कहलस, अच्छा.., नागों का जश्न, नाग का प्यार वगैरह प्रोग्राम त कई दिन ले देखावत रहे ल, बाकिर ऊँट से एके घंटा में फाइनल करवावत बाड़ऽ.

ओने से भाजपा के जलूस निकलत रहुवे त ऊँट भाजपा के झण्डा उपर कर लिहुवे. जलूस बाला लोग ऊँट के काजू के बरफी खिअवलसि आ एगो कार्यकर्ता वादा कईलसि कि जीतला का बाद ऊँट के अमेरिकन ऊँटनी का साथे छुट्ती मनावे खातिर स्वीट्जरलैण्ड भेजल जाई.

फेर कांग्रेस के जलूस लउकल, त ऊँट कांग्रेस के झण्डा उठा लिहलसि. अबकी बेर ऊँट से कहल गईल कि लम्बाई बढ़ाओ आयोग के अध्यक्ष ओकरे के बनावल जाई.

ओकरा बाद बहुजन समाज पार्टी का रैली में ऊँट हाथी का गले मिलल.

हम डँटनी, ऊँट रउरा विश्वास करे लायक ना रह गईनी. राउर त कुछ पक्के नईखे.

हमार पक्का नईखे, तबहियें नू तूंहुँ इन्तजार करत बाड़ऽ. जेकर सबकुछ पक्का होखेला ओकरा में मीडिया के कवनो दिलचस्पी ना रह जाव. पक्का त अब मदनलाल खुराना जी के बा कि कतहीं ना जईहें. देख लऽ मीडिया में केहू उनुका से बाते नइखे करत. ऊँट एगो महीन बात कहलसि.

खैर पता चलल कि ई त नटवर सिंह के बेटा जगत सिंह के ऊँट रहुवे. जगत पहिले कांग्रेस में रहलें, पिछला हफ्ता बीएसपी में रहलें, परसों बीजेपी में रहलें. ताजा स्कोर मालूम नइखे.

हम ऊँट नम्बर दो, ऊँट नम्बर तीन, ऊँट नम्बर चार सबका से मिलनी. सभकर इहे हाल रहुवे.

फेर एगो ऊँट विशेषज्ञ बतलवलन कि दिल्ली में सगरी ऊँट अइसने बाड़न सन, कवनो जगत सिंह के बा, कवनो भजनलाल जी के, कवनो रामविलास पासवान जी के.

अब रउरे बतलाईं कि कइसे बतलावल जाव कि ऊँट कवना करवट बईठी.

---

आलोक पुराणिक जी हिन्दी के विख्यात लेखक व्यंगकार हईं. दिल्ली विश्वविद्यालय में वाणिज्य विभाग में प्राध्यापक हईं. ऊहाँ के रचना बहुते अखबारन में नियम से छपेला. अँजोरिया आभारी बिया कि आलोक जी अपना रचनन के भोजपुरी अनुवाद प्रकाशित करे के अनुमति अँजोरिया के दे दिहनी. बाकिर एह रचनन के हर तरह के अधिकार ऊहें लगे बा.

पुराणिक जी के ई रचना आ अउरिओ कई गो रचना बरीसन पहिले अंजोरिया पर प्रकाशित भइल रहली सँ. पुरनका अंजोरिया चूंकि वर्डप्रेस पर ना रहल से ओह पर के रचना गँवे गँवे एह ब्लॉग पर डालल जात बा. अबहियों एगो बड़हन भण्डार बाकी बा आवे से. एहसे रउरा से निहोरा बा कि बीच बीच में आवत रहीं आ नया रचनन ला अंजोरिया के वर्डप्रेस संस्करण पर जाइल करीं. 

व्

ओटोक्का, होबालू, होटूंगा

 

ओटोक्का, होबालू, होटूंगा

आलोक पुराणिक

खराब खबर नियरा से आवेला निमन खबर दूर से.

काल्हु रात पुलिया का लगे हमरा संगे छिनतई हो गईल, मतलब कुछ लोग हमार सब कुछ लूट लिहलन. हमार सातो रुपिया छीन लिहलन सन. हम ओहनी के धमकवनी कि अगिला पुलिया पर पुलिस पिकेट बा जा के शिकायत कर देम, त ऊ हँसे लगले सन. कहले सन, पुलिसे से पूछ के त एह पुलिया पर छिनतई करत बानी सन.

निमन खबर दूर से ई आईल कि अदन का खाड़ी का लगे एगो भारतीय नेवी अपना देश के एगो व्यापारिक जहाज के लूटे से बचा लिहलसि. सोमालिया के डकैत लूटै आईल रहले सन. छोट छोट डेंगी लेखा नाव पर सवार लूटेरा दुनिया जहान के बड़ बड़ जहाज के लूटे खातिर कमर कसले, नजर टिकवले सोमालिया के समुद्री डाकू एक तरह से अभिनन्दनीय लागे लन स.

"सतसैया के दोहरे अरु नाविक के तीर. देखन में छोटन लगे, घाव करे गम्भीर" वाला कवित्त के सही साबित करत कि विशाल जहाजन के छोटकी नाव पर सवार हो के लूटल जा सके ला. सोमालिया के डकैत ई बात बार बार बतलावत बाड़े सन. स्माल स्केल के महत्व विराट का आगा खतम नइखे हो गईल, सोमालिया के डाकू बेर बेर ईयाद दिआवेले सन.

खैर मसला ई बा कि अगर नेवी वाला गहिरा समुन्दर में जा के डाकूअन के पकड़ सकेलन स त ई हमनी का शहर मुहल्ला के राहनज, डाकूअन के काहे ना पकड़ल जा सके ?

नेवी के एगो बंदा एह सवाल का जवाब में बतलवलसि कि गहिरा समुन्दर में डाकूअन के पकड़ धकड़ का बाद ओहिजा के टापमटाप नेता के फोन ना आ जाला कि छोड़ दऽ. आ अगर आईयो जाव त नेवी वाला ओकनी के भसे ना बुझ पावत होखिहन.

जईसे सोमालिया के डाकूअन के धर पकड़ का बाद सोमालिया के कवनो लीडर के फोन नेवी का अफसर का लगे आईल होखी,
होकाला, बोकालम ओटोक्का, होबालू, होटूंगा. मतलब हमरा बंदन के छोड़ दऽ.

नेवी वाला बूझबे ना कइले होखिहन सन. समुझले होखिहन सन कि ब्रेक डांस खातिर कवनो गाना गावत होखि. आ एहि कन्फ्यूजन में डकैत अरेस्ट हो गईल होखिहन सन.

ई त बहुत मजे क कन्फ्यूजन बा.

नगला शोला भोला थाना में तमिलनाडु के अफसर ले आके बईठा देबे के चाहीं. लोकल रहजन भीतर होखे आ लोकल विधायक फोन करे त तमिल अफसर समुझे से इन्कार कर देव आ रहजनवा भीतरे रहि जाव.

कन्नड़भाषी पुलिस के चित्तौड़गढ़ में लगा दऽ. मलयाली पुलिस लखनऊ का हजरतगंज में गश्त करे.

भाषा जोड़े ले, चोर आ पुलिसो के. एह एकता के भसे से तूड़ल जा सकेला.

या त पुलिस के इलाका बदल दऽ भा फेर कंपलसरी कर दिहल जाव कि यूपी के रहजन डाकू आपन हुनर कर्नाटक में देखलईहन. बोले त एक इलाका के कलाकार दोसरे इलाका में करतब देखइहन जा.

वइसहूँ एक तरहा से त आजुओ देखावते बाड़न सन, पूरा भारतवर्ष के नेतवा दिल्ली में आपन हुनर देखावत बाड़न सन कि ना ?

---

आलोक पुराणिक जी हिन्दी के विख्यात लेखक व्यंगकार हईं. ऊहाँ के रचना बहुते अखबारन में नियम से छपेला. अँजोरिया आभारी बिया कि आलोक जी अपना रचनन के भोजपुरी अनुवाद प्रकाशित करे के अनुमति अँजोरिया के दे दिहनी. बाकिर एह रचनन के हर तरह के अधिकार ऊहें लगे बा.

 

पुराणिक जी के ई रचना आ अउरिओ कई गो रचना बरीसन पहिले अंजोरिया पर प्रकाशित भइल रहली सँ. पुरनका अंजोरिया चूंकि वर्डप्रेस पर ना रहल से ओह पर के रचना गँवे गँवे एह ब्लॉग पर डालल जात बा. अबहियों एगो बड़हन भण्डार बाकी बा आवे से. एहसे रउरा से निहोरा बा कि बीच बीच में आवत रहीं आ नया रचनन ला अंजोरिया के वर्डप्रेस संस्करण पर जाइल करीं. 

राजा भर्तृहरि के बैरागकथा नया अन्दाज में

 

राजा भर्तृहरि के बैरागकथा नया अन्दाज में

आलोक पुराणिक

राजा भरथरी अपना परम प्रिय रानी से राज के बात बतलवलन ‍हे प्राणपियारी, हमार मेडिकल रिपोर्ट आईल बा जवना में हमरा कैंसर के शक बतलावल गईल बा. सुनऽतानी एह बेमारी के ईलाज स्विट्जरलैण्ड में होखेला. ओहिजा जा के आपन इलाजो करवा आयेम आ हालही में हवाई जहाज घोटाला में जवन रकम बटोरले बानी तवनो के स्विस बैंक में जमा करववले आयेम. राज के बात बा एहसे ई बात बस तोहरे के बतालवत बानी. काहे कि जवन डाक्टर हमार जाँच कईले रहुवे ओकर मर्डर करवा दिहले बानी आ आरोप ऊह ससुरा कवि पर लगवा दिहल बानी जवन आपन कविता सुना के सबके बोर करत रहेला. हम ई घोषणा करवा देम कि ऊ कवि डाक्टर के जबरिया आपन पचास गो कविता सुना दिहलसि जवना चलते डाक्टर बोर होके मर गईल.

अतना सुनते रानी कांप उठली. ऊ कवि ऊनुकर प्रेमी रहुवे.

ओहि रात रानी अपना कवि प्रेमी के बतला दिहली, ए कवि जी, तू एहिजा से फूट लऽ ना त जिनिगीये से फूट जईबऽ. तू जा के फ्रांस में एनआरआई बन के सेटल हो जा, फेर हमहूं ओहिजे आ जायेम. तहरा हमरा प्यार परलागल बुधवा के गरहन अब खतम होखे वाला बा काहे कि ऊ अब निपटे वाला बा. बस ई राज के बात केहू से कहीहऽ मत.

बेचारा प्रेमी कवि अतना सुनते कांप गईल कि एह रानी का साथ ओकरा पूरा जिनिगी बितावे के पड़ी. ऊ त एही फिराक में रहुवे कि राजा जियत रहे, रानी का साथे ओकर चक्कर चलत रहे आ ओकर मुर्गा मोबाइल लाइफ स्टाइल के बिल रानी भरत रहे. संक्षेप में ई कि रानी बस ओकर प्रेमिके बन के रहे.

कवि ई बात अपना असली प्रेमिका के जा बतलवलसि. संगही धिराईयो दिहलसि कि केहू से कहीहऽ जिन.

ऊह प्रेमिको के एगो दोसर प्रेमी रहुवे, एगो दरोगा. ऊ पूरा किस्सा ओह दरोगा के बतला दिहलसि.

दरोगा के दोस्ती एगो स्मगलर से रहुवे. एकदिन खायेपिये का बईठका में ऊ दरोगा ई बाति ओह स्मगलरवा से बता दिहलसि कि राजा टें बोले वाला बा आ नया सेटअप में अबहिये से जोगाड़ बईठावल शूरु कर दऽ. आ सुनऽ ई राज के बाति बा केहू से कहीहऽ मत.

स्मगलर के हमजोली एगो नेता रहुवे. ऊ नेता से कहलसि कि गुरु राजा टें बोलेवाला बा. ओकरा के जा के समुझावऽ कि कुछ रकम तोहरा मार्फत तोहरा दारू, स्मैक, चरस, कैबरे, हवाला का धंधा में लगा देव. बहुते रिटर्न मिली, स्विसो बैंक ले जियादा. बाकिर ई बात राज के बा केहू से कहीहऽ मत.

अगिले दिन ऊ नेता राजा से भेंट करे चल दिहलसि. जाके राजा से का कहलस कि का स्विस फ्विस बैंक का चक्कर में पड़ल बानी. एहिजे सगरी रकम लगा देम धांसू धंधा में.

राजा ताड़ गईलन कि दाल में करिया नईखे दलवे करिया गईल बुझात बा. दहाड़त पुछलन, बताव तोरा के के बतलवलसि हमरा स्विस यात्रा आ बेमारी के बात ? ना बतलइबे त तोरा के हम ओही कवि का कोठरी में ठेल देम ओकर एक सौ कविता सुने खातिर. जल्दी बोल.

नेता के हकबकी लाग गईल. डरते डरत पूरा किस्सा बयान कर दिहलसि कि ऊ सम्गलरवा से सुनलस, स्मगलरवा दरोगवा से, दरोगवा अपना वेसवा प्रेमिका से, वेसवा प्रेमिका अपना प्रेमी कवि से, आ ऊ कवि रानी से ई बात जनलसि. रानी के त रउरे बतलवले रहनी.

अतना सुनते भरथरी के दिल टूट गईल. समुझ में आ गईल कि दुनिया गोल बा आ गोलमालो. बैराग धड़ल्ले से दिल का कोठरी में घुसल आ राजा सब कुछ छोड़ के जंगल में जाये के तय कर लिहलन. एतना निश्चय करिके ऊ रानी से बतलावले चलल कि रानी माफी मांग लीहि त ओकरो के अपना संगे लिअवले जायेम.

रानी जब पूरा बात सुनली त कहली, ठीक बा. जाते बानी त अपना स्विस बैंक के खाता नम्बरवा त बतलवले जाईं. माया के तियाग करते बानी त हमरे के दिहले जाईं.

रानी के ई वचन सुनते राजा भरथरी के खटाक से ओहीजे मोक्ष मिल गईल.

बोल नोटाय नमः. बोल खोटाय नमः

---

आलोक पुराणिक जी हिन्दी के विख्यात लेखक व्यंगकार हईं. ऊहाँ के रचना बहुते अखबारन में नियम से छपेला. अँजोरिया आभारी बिया कि आलोक जी अपना रचनन के भोजपुरी अनुवाद प्रकाशित करे के अनुमति अँजोरिया के दे दिहनी. बाकिर एह रचनन के हर तरह के अधिकार ऊहें लगे बा.

आलोक जी के ई आ बाकी रचना भोजपुरी में पहिलका वेबसाइट अंजोरिया पर प्रकाशित भइल रहल.

अशोक द्विवेदी जी के तीन गो कविता

अशोक द्विवेदी जी के तीन गो कविता अंजोरिया के पुरनका संस्करण पर अंजोर भइल रहल. आज ओहनी के अंजोरिया के नयका संस्करण पर अंजोर कइल गइल बा. गाँव के कहानी (1) गाँव के कहानी (2) गाँव के कहानी (3)

चुटपुटिहा

(बीस बरीस पहिले ह्वाट्सअप के जमाना ना आइल रहुवे. हँ मोबाइल आ गइल रहुवे आ ओकरा पर तब एसएमएस से लोग छोट मोट - चुटपुटिहा - पोस्ट लिखल करे. तब ई एक एक कर के अँजोर होत रहल. बाकिर अब पुरनका अंजोरिया पर अँजोर भइल सगरी चुटपुटिहा एहिजा एके जगहा दीहल जा रहल बा. कुछ पर भेजे वालन के नाम बा, कुछ पर नइखे. बाकिर रउरा एहमें से कवनो चुटपुटिहा अपना सोशल साइट पर डाल सकिलें. अंजोरिया के आभार जता देब त हमरो खुशी होखी, ना जताएब त कवनो शिकायत ना होखी. - संपादक)

 चुटपुटिहा

 

जिनिगी बहुत छोट होले.

मुसुका लीं जबले दाँत बा.

----------------------------------------

अगर भोजपुरी लिखे पढ़े बोले बतियावे ना आवे त भोजपुरी के नाम रउरा से नइखे होखे वाला रउरा नाम कमा लीं से अलग बात बा.

----------------------

हम जानत रहनी कि क्रिकेट के खेल गजबे होला. एक न एक दिन हमनियो से खराब खेले वाला आ जइहें.

------------------------

आज पता लागल कि पार्टी के उपाध्यक्षो पद खास होला. जे जाने से तनी बतावे त सही कि भाजपा, जदयू, अकाली दल, बसपा, सपा के उपाध्यक्ष के ह? भा के के ह?

-----------------------------------

बेइज्जति आ बीबी एके जइसन होले.

कइसे?

दुनु तब अउर नीमन लागेले जब दोसर के होखे.

----------------------

राहुल के उमेद बढ़ गइल बा.

- काहे?

काटजू के कहना बा कि नब्बे फीसदी हिंदुस्तानी बोका हउवें.

--------------------

कवि जी कविता सुनावत रहलें -

हम उहे हईं बस समय बदल गइल बा.-

सामने से आवाज आइल --

सियरा उहे ह बस रंग बदल गइल बा.

-------------------------

कवि जी कविता सुनावत रहलें -

हम उहे हईं बस समय बदल गइल बा.-

सामने से आवाज आइल --

सियरा उहे ह बस रंग बदल गइल बा.

--------------

बबुआ के बिआह काहे नइखे होखत?

माई रोजे कहत रहेली बहु मत दीं, बहु मत दीं.

----------------

तुहूं लूटऽ हमहुं लूटीं लूटे के आजादी बा.

सबले बेसी उहे लूटी जेकरा देह पर खादी बा.

------------------------

पता ना बैंगन टमाटर के बाकी फलन से कवन झगड़ा भइल जे आजु ले ओहनी के तरकारिए में गिनल जाला.

---------------------

कान के कान कहल बर्दाश्त ना कइल जा सके. राजनेता तय कइलन कि कार्टूनन पर कार्टून बनावे पर रोक लगावल जाव.

-----------------------

ओकरा से पूछब हम कि हमहन के काहे चोर कहलसि.

काहे सही बात कहलसि काहे ना कुछ अउर कहलसि ?

------------------------

पीएम अधिकारियन के सलाह दिहलन -

चढ़ि जा बेटा सूली पर भला करेगा राम!

--------------

बुड़बक जिन्दा रहें त चाल्हाक खइला बिना ना ना मुए.

ना मानऽ त जा के बाबा दरबार में देख ल.

--------------------------

"एह सरकार में के के ईमानदार बा?"

"जे जे अबहीं ले पकड़ाइल नइखे!"

--------------------

" हमरा लगे आर्कूट बा, ट्विट बा, फेसबुक बा. तोहरा लगे का बा? "

"काम धंधा."

--------------------

सब जगहा हारत कांग्रेस मणिपुर कइसे जीत लिहलसि?

प्रचार करे खातिर राहुल गाँधी ना गइल रहले.

------------------

अधरतिया में एगो विद्यार्थी मोबाइल पर :- ए गुरुजी दिन वाला पाठ फेर बता सकीलें का ?

गुरुजी :- का बात बा ? बहुत बढ़िया लागल रहे का ?

विद्यार्थी : - ना, असल में हमरा नींद नइखे आवत आ सूतल चाहत बानी.

------------------------

नेताजी कहलन कि उनुका पार्टी के सरकार बनल त शिक्षा, पानी, दवाई सब मुफ्त कर दिहल जाई. जनता पूछलसि, आ एह सब के पइसवा केकरा बाप से लिहल जाई ?

-----------------------

तोहरा बारे में दोसर केहु का सोचत बा, ई सोचल तोहार काम नइखे.

----------------

हमरा से झूठ बोलल तोहरा खातिर जरूरी नइखे. एह काम खातिर सरकार बड़ले बिया.

-------------------------

कई बेर बेमारी से बेसी नुकसान इलाज के खरचा कर देला. इलाज से त ना बाँच सकऽ, बेमारी से बाँचे के कोशिश करीहऽ.

-------------

हम अपना बीबी खातिर गोली खा लेब. बशर्ते ओकरा के कवनो बन्दूक भा पिस्तौल से मत छोड़ल गइल होखे.

-------------------

आलसी के कवनो ईनाम होखे त बतइहऽ. केहू ना केहू के भेज देम ले आवे खातिर.

---------------------

चार लोग एके दिसाईं तब चलेलें जब पाँचवा कान्ह पर होखे.

------------------

हम झूठ एकदम ना बोलीं. कम से कम तोहरा से त नाहिये. आ कम से कम एह बारे में त नइखिंये बोलत, विश्चास करऽ.

--------------

हम झूठ एकदम ना बोलीं. कम से कम तोहरा से त नाहिये. आ कम से कम एह बारे में त नइखिंये बोलत, विश्चास करऽ.

-------------------

पुरनका जमाना बढ़िया काहे लागेला ?

उमिर का साथ याददाश्त कमजोर होत गइला से.

-----------------

अगर समय धन होला त हम काहे अबहियो दिवालिया बानी जेकरा लगे समये समय बा ?

--------------------

का अन्तर पड़त बा कि तू हरलऽ कि जीतलऽ. बोलबऽ त हर बेर जीतहीं के बतिया !

जियत रहऽ ! कमरी ओढ़ के घीव पियत रहऽ.

------------------

दिल्ली भूकंप पर

प्रधानमंत्री भूकंप के कायराना हरकत बतवले.

गृहमंत्री भूकंप के निंदा कइले.

भाजपा केन्द्र सरकार से पूछलसि कि ऊ भूकंप काहे नइखे रोक पावत.

राहुल गांधी भूकंप वाला इलाका देखे गइले.

----------------------

जब रउरा अपना ताकत पर सन्देह करीले तब रउरा अपना सन्देह के ताकत दे दीले - प्रभु चावला के ट्वीट

-------------------

जब पार्टी के मुँह अपना नेता का तरफ आ पिछाड़ जनता का तरफ होखे त जनता लतियावल छोड़ के करे का !

--------------------

केहू के आलोचना करे से पहिले ओकर जूता पहिर के एक माइल चल लऽ. एह तरह से जब तू ओकर आलोचना करबऽ तब ओकरा से एक माइल फरका होखबऽ आ ओकर जूता तोहरा गोड़ में होखी.

---------------------

सतसइया के दोहरे अरु नावक के तीर

देखन में छोटन लगे घाव करे गभीर.

-------------------

तेल के दाम बढ़ी त महँगाई बढ़ी. महँगाई बढ़ी त आम आदमी के तेल निकले लागी. आ आम आदमी तेल देवे लागी त महँगाई अपने आप कम हो जाई.

केन्द्र सरकार के फण्डा.

-------------------

भठियरपन का खिलाफ लड़ेवाला हर आदमी संघी ना हो सके.

फेर संघ के प्रचार कर के कांग्रेस के का भेंटाई ?

भठियरपन के तगमा ??

---------------------

चिदम्बरम जी, लुंगी सम्हारऽ हवा तेज चलत बिया.

( टाइम्स आफ इण्डिया पर एगो पाठक के टिप्पणी.)

----------------------

बाग बगइचा राहे पइचा

ठग बटमार भरल बाड़े स.

जनता जनता माला जप के

आपन कोष भरत बाड़े स.

एह नेतवन के कवन भरोसा

रोजे खाल बदल लेले सँ.

करत घोटाला रोजे रोजे,

भासन देत टहल लेले सँ.

-------------

आजु के समस्या :

बाबा रामदेव का मुँह में कुछ जात नइखे, आ

मनमोहन का मुँह से कुछ निकलत नइखे.

---------------------

जे बीस का उमिर में समाजवादी ना भइल ओकरा लगे दिल नइखे.

जे चालीसो का उमिर में समाजवादी बनल रहि गइल ओकरा लगे दिमाग नइखे.

------------------

इलाज सरकारी ना चाहीं,

पढ़ाई सरकारी ना चाहीं.

बाकिर नौकरी सरकारिये चाहीं.....

--------------------

खबर -

अँजोरिया फेर शुरु हो गइल.

कहाउत -

बजलऽ ए शंख, बाकिर बाबाजी के पदा के !

----------------------

खबर -

भगोड़ा आतंकी का लिस्ट में शामिल वजहुल कमर खान देशे में मौजूद बा.

कहाउत -

गोदी में लड़िका, भर गाँव ढिंढ़ोरा

----------------------------

खबर -

सुप्रीम कोर्ट का नजर में देश के कानून अमीरन खातिर बा.

कहाउत -

समरथ के नहीं दोष गुसाईं

----------------------------

के कहत बा कि देश के एक तिहाई पर अब महिला राज बा?

एहिजा त हर घर में महिला राज जमाना से चलत आइल बा.

----------------------

कामवेल्थ घोटाला होखे भा टू जी,

रेप होखे भा हेराफेरी,

चेहरा तोपला के जरुरत नइखे.

जतने लोग चिन्ह लेव,

चुनाव मे फयदे करी.

--------------------

पाकिस्तान में केहू सुरक्षित नइखे, इहाँ तक कि बिन लादेनो. जबकि हिन्दुस्तान में सभका सुरक्षा बा आ सबले बेसी अफजाल आ कसाब खातिर. जय हो !

- प्रभाकर पाण्डेय

------------------

अमेरिका पाकिस्तान में घुस के अपना दुश्मन के मार गिरवलसि. हमनी का अपना दुश्मन के सरकारी दामाद बना के रखले बानी जा. धिक्कार बा ! कि कहीं जय हो ?

--------------------------

ईमानदार दू तरह के होलें. पहिला ऊ जेकरा मौका ना मिलल. दोसर ऊ जेकरा हिम्मत ना भइल.

------------------------

जे खुद कुछ नइखे कइले ऊहे दोसरा के कुछ करे से रोके में सबले आगा रहेला.

- चीन के एगो कहावत

--------------------

खरबका के हिंसा ओतना नुकसान ना करे जतना निमनका के चुप्पी कर देले.

-----------------------

अगर सभे रउरे तरफ बढ़ल आवऽता त देखीं रउरा कहीं गलत दिशा में त नइखीं जात.

--------------------

आफिस से बाहर बानी. टॉयलेट, एसी, बेड, इमेल कुछऊ नइखे. जबले बेल ना मिली तबले जेल.

- टूजी मामिला में जेल गइल एगो कंपनी अधिकारी के एसएमएस

------------------------

हिम्मत से साँच बोलऽ त खिसियात बाड़े लोग

रो रो के बात बोले के आदत रहल ना अब.

- सुभाष राय

-----------------

चइत में रामजी जनम लें हो रामा, घरे घरे. घरे घरे आनन्द बधईया हो रामा, घरे घरे.

-------------

बजलऽ ए शंख बाकिर बाबाजी के पदा के !

-------------------

भारत के जीत खातिर सचिन तेंदुलकर के लाख लाख धन्यवाद कि ऊ जल्दी आउट हो गइलन.

------------------

गोतिया के काट गोतिये करेला. पड़ोसी के काटऽ तब नू जानी ....

---------

कुछ लोग एह चलते जिन्दा रहि जाला कि ओह लोग के मुआवल गैरकानूनी होला...

----------------------

होली का सुरुर में भोला बाबू आइना देखत सोचलन

एह आदमी के कहीं देखले बानी.

तब याद पड़ल

हँ उहे कमीना हऽ

जवन हमरा शादी का अलबम में हमरा बीबी का साथे रहुवे....

-------------------------

आज मुबारक काल्हु मुबारक

होली के हर मिनट मुबारक

रंग बिरंगी होली में

हमरो एगो रंग मुबारक....

---------------------

हमरा एसएमएस के जवाब ना भेजलऽ

त जान लीहऽ

सोमार का दिने

तू हरिया पियर करिया लाल बन जइबऽ..

--------------------------

गलत बुझइला पर आपन बात बदल दिहल खराब ना होला, बात पर अड़ल खराब होला. कहल गइल बा कि बीस का उमिर में कम्युनिष्ट ना भइल त ओकरा लगे दिल नइखे, पचास का पारो कम्युनिष्ट रह गइल त ओकरा लगे दिमाग नइखे.

---------------------

प्रणाम करे खातिर झुकल लड़की के का देखाई देला ?

-

-

-

-

-

- ओकर संस्कार.

----------------------

तीनो इडियट सफल रहले एकर एगो कारण बताईं.

- कवनो के बिआह ना भइल रहे.

-----------------------

एगो कार से एगो तोता के चोट लाग गइल.

तोता बेहोश हो गइल.

कार वाला ओकरा के उठा के घरे ले गइल

आ मरहम पट्टी कर के पिंजड़ा में राख दिहलस.

जब तोता के होश आइल त कहलस

बाप रे, जेल !

ड्रइवरवा मर गइल का ?

-----------------------

केहू से प्यार कइल पागलपन हऽ

केहू प्यार करे त उपहार.

प्यार करे वाला के प्यार कइल कर्तव्य हऽ

बाकिर जेकरा के तू प्यार करऽ

जब ऊ तोहरा से प्यार करे लागे

त जिनिगी बन जाले.....

----------------------------

खुश रहे खातिर तीन चीज के जरुरत होला

कुछ करे के होखे

केहू प्यार करे वाला होखे

आ

मन में कवनो चीज के आस होखे....

-------------------

तोहार कर्म तोहार करम बदल सकेला

बाकिर तोहार करम तोहार कर्म ना कर सके.

नियत ठीक राखऽ त

नियति तोहार कुछ ना बिगाड़ पाई.

----------------------

आशावादिता के परिभाषा :

दुबई में फ्लैट खरीदऽ आ ओकरा बेचा जाये के उमेद करऽ.

दू गो अरबी मिल जुल के का बिजनेस करेले?:

एगो बालू पर अपार्टमेंट के नक्शा बनावेला आ दोसरका ओकरा के देखा के भारत के नयका धनपशुवन के बेच देला.

-----------------------

कहल जाला कि बुड़बक के पांच गो रुपिया दे दऽ, बुद्धी जन दऽ.

तोहरा के कतना दे दीं?

-------------------

छोट लोग पइसा पइसा करेला

बड़ लोग टाइम टाइम.

महान लोग रास्ता बनावेला

छोटका लोग बस पाछा पाछा चल देला

कामकाजी लोग एसएमएस करेला

निकम्मा लोग बइठल पढ़त रहेला

---------------------

तोहरा के नौकरी से काहे निकाल दिहल गइल?

बीमारी आ परेशानी का वजह से.

का हो गइल रहे?

हमरा काम से मालिक अतना परेशान हो जात रहे कि ओकरा बोखार लाग जात रहे.

---------------------

मस्त रहऽ, आबाद रहऽ,

ईहाँ रहऽ चाहे इलाहाबाद रहऽ!

----------------

रात भर जागल मत करऽ

सूत लिहल करऽ.

आँख में झलकल लोर मत रोकऽ

रो लिहल करऽ

हमरा याद में त रहबे करेलू गुमसुम

कबो कबो

अपनो याद में खो लिहल करऽ

------------------

अइसनका काहे होला कि

जवन मिलल बा

तवन चाहत ना रहे

जवन चाहत रहे

तवन मिलल ना.

त का मिललके के चाहल जाव?

-----------------

चिउँटियन के कतार देखले बाड़?

कतनो व्यस्त रहेली सँ

बाकि अपना सामने से आवत चिउँटी से बिना बतियवले आगा ना बढ़ऽ सँ.

आवऽ कुछ ओकनियो से सीखल जाव.

आ हमेशा एक दुसरा से जुड़ल रहल जाव.

----------------

पेड़ से गिरल पतई आ

नजर से गिरल आदमी

दुबारा उपर ना चढ़ पावे.

एहसे सम्हर के चढ़ीहऽ

आ हमेशा मुसुकात रहीहऽ....

-----------------

खुदा करे कि तोहरा

होंठ से मुस्कान मत हटे,

दुनिया में कबो केहू

तोहसे ना रूठे.

मेहरबान होखे तोहरा पर

उपर वाला अइसे कि

आसमान के तारो

तोहरा से पुछिये के टूटे...

----------------------

पईसा झंझट के जड़ हऽ

पईसा दुश्मन पैदा कर देला

पईसा जिनिगी के नरक बना देला.

हम तोहार दोस्त हईं

आ तोहरा के एह संकट में ना देख सकीं,

एहसे

आजुवे अपन सगरी पईसा हमरा खाता में भेज दऽ

-------------------

हमेशा आबाद रहऽ

एहिजा रहऽ चाहे इलाहाबाद रहऽ

भगवान हर खुशी देस तोहरा के

भले ओह खुशी में हम

होखीं भा ना होखीं

--------------

मत पूछऽ कि बा कहाँ मंजिल तोहार?

अबहीं सफर के इरादे भर बा.

ना हारब कबो हौसला हम उमिर भर.

दोसरा से ना खुद से वादा ई बा.

--------------

जो हम सच नइखी बोलत त तू समझ लीह

एकरा खातिर भी तोहरे हिदायत होई !

लालच में बानी सुनि के कि तोहार कफ़न के दूकान बा

त चलऽ ज़नाजा क समय कुछ त रियायत होई !

----------------------

दोस्त के हऽ?

जे बे बोलवले आवे,

बिलावजह सिर खाये

रउरा एक कहीं त ऊ चार सुनावे

कबो सतावे

कबो रुलावे

बाकि हरमेस साथ निबाहे...

---------------

दुश्मनी अइसने करऽ कि

जब फेर से दोस्त हो जाइल जाव

त लजाए क ना पड़े.

----------------

कुछ काम कइले बिना छूट जाला

कुछ बात कहले बिना छूट जाला

बाकिर बहुते कम लोग तोहरा जइसन होले

जिनकर याद भुलवलो पर छूट जाला.

--------------------

केहू पुछल हमरा से -

प्यार कब होखेला?

हम कहनी -

जब किस्मत खराब होखे,

रउरा लगे कवनो काम ना होखे,

राशि पर शनि सवार होखे,

आ उपर वाला के मन में,

रउरा से मजाक करे के विचार होखे....

-------------------------

मु्स्कान का पाछा हरदम खुशी के बात ना होला

आँसू का दरियाव में हमेशा गम के बात ना होला.

दूरी बढ़ जाव कतनो दोस्ती आ मोहब्बत में

प्यार के भाव तबहियों कम नही होला...

----------------------------

जानियो के ऊ जान ना पइलें हमके

आजु ले पहिचान ना पइलें हमके.

उनका पर इल्जाम ना लागे कवनो

एहसे खुद ही कर लिहनी बेवफाई उनसे..

-----------------------

जिनिगी में

नया नया रिश्ता बनवला से बेहतर

पुरनका रिश्तन में

नया जिनिगी डालल होखेला.

---------------------

का कहीं?

कहाते नइखे.

कहला बिना रहातो नइखे.

तोहार ई चुप्पी हमरा से सहातो नइखे.

यार! कुछ त बोलऽ.

मुँह त खोलऽ.

हमहूं त जानीं कि

का घोंटत बाड़?

------------------

जिनिगी बहुत छोट होले.

मुसुका लीं जबले दाँत बा.

--------------

कारण पता चलल तहार मुँह छिपावे के

चुरा ना ले जाव केहू अदाज मुसकाये के

---------------------

दुनिया के देखनी जीत के

छूंछे सभे गइल

ओकरे रहल बा जेकर

निबहल बा यार से.

---------------------------

अनजान मुलाकात पहिचान बन गइल

एगो नेह भरल रिश्ता के आधार बन गइल

दू कदम तू चललऽ दू कदम हम,

आ दोस्ती के राह आसान बन गइल.

--------------------------

का हो,

ना त एगो फोन ना एसएमएस !

आ हमेशा मोबाइले झमकावत रहेलऽ.

अरे मरदे, रखले बाड़ऽ त इस्तेमाल कइल करऽ.

----------------------

चईता में रामजी जनम लें

हो रामा, घरे घरे.

घरे घरे आनन्द बधईया

हो रामा, घरे घरे.

----------------------

चूहा शेरनी से प्रेम देखवलसि

लाल गुलाब भेंट चढ़वलसि

शेरनी धिक्करलसि -

चल पहिले आपन शकल त देख.

चूहा जवाब दिहलसि -

शकल पे मत जा, हमार जजबात त देखऽ

--------------------

याद करबऽ त याद आ जायेम

देखल चहबऽ त दिख जायेम

बाकिर भुलाइयो के जन भूलईहऽ हमरा के

ना त अइसन लुकायेम

कि फेर नजर ना आयेम...

-------------------

वरुण गाँधी के फाँसी पर लटका देबे के चाहीं.

 

 

काहे ? 

 

 

 

 

काहे कि अफजाल के फाँसी पर लटकावे में दिक्कत आ रहल बा....

---------------------

सब केहू के बता दिहल जा रहल बा कि हम पीएम का रेस में शामिल नईखीं.

 

वईसे मिल जाई त बईठे में देरी ना करेम.

--------------------------

सबले निमन के ?

हमरा भईया के साली के दीदिया के देवर. आउरी के !

-----------------------

बढ़िया लोग के संगति

ईत्र के दोकान जइसन होला.

रउरा किनी भा ना

गँध त मिलिये जाई

--------------------

पिटाईल चोर आ उपासल पाहुन फेर लवटि के ना आवे.

बाकिर तूँ ?

तहरा के का कहल जाव ?

----------------------

रंग से भरल शाम होखे राउर

चाँद से भी ज्यादा शान होखे राउर

जिन्दगी के सिर्फ एगो रहे मकसद

की लंगूर से भी ऊचा छलांग होखे राउर ..

बुरा मत मानब होलिये नु हां

----------------------------------

साली मोर बनारसी, होठे लाली पान

फागुन में अइसन लगे जस बदरी में चान

---------------------

भावुक हो तोहरा बिना कइसन ई मधुमास

हँसी-खुशी सब बन गइल बलुरेती के प्यास

-------------------------------------

अइसन त बात नइखे

हरदम तू इयाद रखबू

अतना त तय बा तबहूं

हमके भुला ना पईबू...

-------------------

राजीव गाँधी सच्चा भारतीय रहलें जे हर हिन्दुस्तानी के अपना भाई बहिन लेखा मानत रहलें.

एहि चलते बिआह करे खातिर विदेशी लड़की ले आवे के पड़ल.

------------------

बसिया खईबऽ कि टटका बना दीं ?

एक संगे सूतबऽ कि भूईयां बिछा दीं ?

चुपचाप रहबऽ कि

सबके बता दीं ?

------------------

लइका :- हमरा से बियाह कर लऽ ..

लइकी :- ना हम ना कर पाइब.

लइका: काहे ? का परेशानी बा ?

लइकी : हमार घर वाला लोग कभी ना तैयार होइहन.

लइका: घर में के के बा ?

लइकी : हमार दू गो छोटका आ एगो ऊ....

---------------------

शहर के गली में पान के दुकान ..

देव दास देखलन पारो के मुस्कान

देव दास खियवलन पारो के पान ..

पान खा के कहली "शुक्रिया भाई जान"

-------------------------

ईहो मेकअप

उहो मेकअप

ऊ लेट होखेले त मेकप करेले

ई मेकप करेले त लेट हो जाले.

बतावऽ के का हऽ ?

------------------

चाँद के गुरुर बा कि

ओकरा लगे हूर बा.

त का भइल ?

हमरो गुरुर बा कि

हमार दोस्त लंगूर बा ..

------------------

मुन्ना भाई : अगर बिना दाँत वाला कुकुर काट ले त का करे के चाही ?

सर्किट : सिंपल बा भाई, बिना सुई वाला इंजेक्शन लगवा लेबे के चाही .

------------

मिले आवे के बात करेलू,

दिल जलावे के बात करेलू,

चार दिन से मुह त धोवले नईखी,

तू नहाये के बात करेलू

-----------------

शेर सुने आ सुनावे में त बड़ा निमन लागे ला बाकिर जब सामने आ जाला त पाजामा आगा से गीला आ पाछा से पीला हो जाला. देखीहऽ कहीं भेंटा मत जाव !

--------------------

कभी हौसला भी आजमा लेबे के चाही

आ बुरा वक्तो में मुस्कुरा लेबे के चाही

अगर सात दिनो में खुजली ना होखे तबहियों

अठवा दिन त जरुर नहा लेबे के चाही

--------------

जेकरा के समझनी कोयल ..

उ कौवा निकलल ..

दोस्ती के नाव पर उ हौवा निकल....

जे करत रहे मना की मत पीहऽ तू शराब..

आज ओकरे जेब से पौवा निकलल ..

---------

पत्नी : सुनीना कि स्वर्ग में पत्नी के साथे पति के ना रहे दिहल जाला..

पति : सही सुनले बाडू.

पत्नी : अइसन काहे..

पति : अरे पागल, एही से त ओकरा के स्वर्ग कहल जाला

------------------------------------

कोहरा का धुंध मे परछाईं जस लऊकेलऽ,

कानन का गूंज में शहनाई जस बाजेलऽ,

साथे रहेलऽ त आपन जईसन लागेला, ना त सीना के साँसो पराया जस लागेला....

-----------------------

तोहरी बगिया बसंत मुस्काईल करे, भँवरा पिरीती के गीत गुनगुनाईल करे, नेह रीते ना कबहू न बाती घटे, तोहरी जिनिगी के दिया जगमगाईल करे .

-‍ देवकान्त पाण्डेय,

------------------

बबुवा तहरा बाबु जी के उम्र केतना होई ?

- जेतना हमार बा.

ई कइसे हो सकेला ?

- जब हम पैदा भईनी तबे नू ऊ बाप बनलन !

- ‍ प्रवीण सिंह

-------------------

पहिले केहू पर दिल ना आईल, 

तहरा से मिलनी त चैन हमरा आईल, 

प्यार में पागल होके कइनी अतना मैसेज, 

दस हजार के बिल हमरा मोबाइल के आईल

- ‍ प्रवीण सिंह

-----------------------

जब से तहरा के जान गइल बानी

तब से तहरा के मान गइल बानी

हमरा हर दुआ में तहर नाम आवेला

कि पूछी हम रब से कि

ई कईसन नमूना बना देले बानी

- ‍ प्रवीण सिंह

----------------

क्रिसमस आ बड़ा दिन का अवसर पर रउरा सभे के बधाई. परमपिता का कृपा से रउरा सभन के नया सालो निमन बीते.

------------------

उ रेशम जैसन बाल वाली

भूरी भूरी आख वाली

राह भटक के अँधेरा में

तहरा पास आके धीरे से बोली ..... मियाऊ.

-----------

भौजी (भइया से गुसामें) .. तहरा दिमाग में त भूसा भरल बा कुछ समझबे ना करेला ..

भइया( प्यार से) .. त इतना देर से खात काहे बाडू

- ‍ प्रवीण सिंह

---------------------

सूरत पर तहरा फ़िदा होके,

अईसन तस्वीर बनवले बानी.

हमरा घर पर नजर ना लगे कोई के,

एही से तस्वीर बाहर गेट पर लगवले बानी....

- ‍ प्रवीण सिंह

---------------------

सवाल - मरद (पति) आ गदहा में का फरक होला ?

जवाब - मरद अकसरहां गदहा निकलेलन जबकि गदहा अतना गदहा ना होला जे ऊ मरद बन जाव.

- ‍ प्रवीण सिंह

---------------------

- ‍ प्रवीण सिंह

---------------------

- ‍ प्रवीण सिंह

---------------------

- ‍ प्रवीण सिंह

---------------------

- ‍ प्रवीण सिंह

---------------------

अगर मरद अपना मेहरारू से कवनो बहस जीत जाव तऽ ओकरा का करे के चाहीं ?

चैन से जिये के मन होखे तऽ माफी माँग लेबे के चाहीं !

-------------------

ना जाने कब कवनो तारा टूट जाय

ना जाने कब आँख के आँसू छूट जाय.

कुछ घरी हमरा संगे हँस लऽ ए दोस्त.

का जाने कब तोहार सामने के दाँत टूट जाय

---------------------------

रात में जागल मत करऽ सूत जाईल करऽ.

अइसहीं मन में आँसू मत रोकल करऽ रो लिहल करऽ.

हमरा ईयाद में त हरमेस रहेलऽ गुमसुम.

कबो कबो अपनो के ईयाद कर लिहल करऽ.

----------------------------

हाट बाट के दोस्ती, बदरायन संबंध़

बहत हवा ना दे सकी बारमबार सुगन्ध.

दोस्ती अजमावे के बात ना, निभावे के बात हऽ, बुझलऽ ईयार ?

----------------------

काश कि रउरा बकरी होखतीं.

हम रउरा के प्यार से घास खियईतीं

आ फेर प्यार से सींग पकड़ के हिलइतीं

आ पूछतीं

चुटपुटिहा के भेजी ?

आ रउरा मिमियतीं मैं.. मैं.... मैं....

------------------------------

उम्मीद नइखे तबहियो जियत जात बानी.

खाली बा बोतल तबहियो पियल जात बानी.

हिम्मत देखऽ हमार, रिस्पांस मिलत नइखे

तबहियो चुटपुटिहा लिखत जात बानी.

----------------------

बहत गंगा में हाथ जरुर धोवे के चाहीं,

बड़ा पुन्न होला!

-------------------

खइले के ना हऽ, पचवलो के हऽ

काजर कइले के ना हऽ, मटकवलो के हऽ.

---------------------------

मन मगन रहऽतावे, सुन्दर लागऽता दुनिया.

जब से खुलल बा वेबसाइट अँजोरिया.

भले चाँद सूरज में गरहन लागत रहे,

या अल्लाह कयामत ले अँजोरिया सलामत रहे.

--------------------------

मेहरारू अपना मरद से पुछलसि,

सुहागराति मे जब पहिलका हालि हमरा के देखलऽ त तहरा कईसन लगनी?

मरद जवाब दिहलसि,

हम त मरिये गईल रहितीं

अगर हमरा हनुमान चालीसा ईयाद ना रहल रहित!

------------------------

सभ केहू व्यस्त बा

अपना जिनिगी का भँवर में.

अइसना में एगो चुटपुटिहा

धीरे से कहि जाले कि

केहू बा,

जे तोहरा के भुलाईल नईखे.

-----------------------

औरतन के गलती के गिनती नइखे

जबकि मरद दूइये गो गलती करेले...

एगो जवन कहेले

दोसर जवन करेले.

--------------------

एह उम्मीद के टूटे मत दीहऽ

दिल के लगी के कम होखे मत दीहऽ

दोस्त मिलिहन बहुते हमरो ले बढ़िया

बाकिर केहू के हमार जगहा लेबे मत दीहऽ

-----------------------------

एगो लड़की से पूछनीं कि

शादी का होला?

कहलसि -

ढेर लोग के सराही नजर छोड़ के.

एक आदमी के ओरहन सुने के मजबूरी!

--------------------

समय से पहिले आ भाग्य से अधिका,

ना तऽ मिलल बा, ना मिली.

बाकिर तहरा का मालूम कि तहरा भाग्य में कतना बा आ तहार समय कब आई ?

एहिसे तू बस हरदम लागल रहऽ !

---------------------------

आपन खयाल रखीहऽ !

ना.

जीते वाला आपन खयाल ना राखे,

ऊ जिम्मेदारी उठावेला, जोखिम उठावेला,

आ हालात पर काबू राखेला !

------------------

पेन्सिल पाँच बाति सिखावेले :-

जवन कुछ करबऽ ओकर निशान रहि जाई

तू आपन गलती हमेशा सुधार सकेलऽ.

असल चीज ऊ बा जवन तहरा भीतर बा.

जिन्दगी अक्सरहाँ दुखदायी तरीका से तहरा के चोख करी.

आ सबसे बड़ बाति ई कि

अपना के उपरवाला के इशारा पर छोड़ दऽ जेकरा हाथ तहरा के सम्हरले बा.

------------------

करबू तू याद कभी कहत राठौर रहे,

बूझबू तू प्रीत हमार, हमरा गुजरला पर.

तबहूँ बहईह मत अँखियन से लोर कभी,

पानी ना छिड़काला आगी में जरला पर.

----------------------

जनतीं जे अइसने मरजी बा तहरो तऽ

कहिये हम मर जइतीं, धिक्कार अइसन जियला पर

अक्सरहाँ होखेला दुनिया में अइसन कि

याद करेला लोग केहू के मरला पर.

-----------------------

कबहूँ त भोर होई, कबहूँ छँटी कुहासा

‘भावुक’ ई मान लऽ तू आगे अन्हार नइखे

----------------------

हमरा आजुवो इयाद बा तहार पहिलका एसएमएस,

हम लिखले रहुवीं कि भेजे वाला चाल्हाक, पढ़ेवाला बुड़बक.

तू खिसिया के लिखले रहलऽ,

ना ! 

भेजेवाला बुड़बक, पढ़ेवाला चाल्हाक !

--------------------

दिल्ली के सरदी,

जैसलमेर के गरमी,

मुम्बइ के बरखा,

पटना के करप्शन,

काश्मीर के आतंकवाद,

अफ्रीका के साँप,

आ यूपी के " आप "

बाप रे बाप !

-------------------

बिहार के डाक्टर,

यूपी के पुलिस,

आ बंगाल के लड़की,

लाजवाब होलें.

-----------

सर्किट मुन्ना भाई से - भाई गाँधी जयन्ती का बारे में बतावऽ

मुन्ना भाई - गाँधी मस्त सॉलिड आदमी रहन यार. बाकिर मा कसम अपुन तनिको नइखे जानत कि जयन्ती का संगे उसुका का लफड़ा रहुवे.

---------------------

तहरा बारे में कुछ सुने में आइल हऽ.

जब फुरसत मिले बतिया लीहऽ.

 

 

 

 

 

 

 

 

 

पहिले पूरा एसएमएस पढ़ लिहल जाला.

-----------------------

का सोचत बारऽ हम तहरा के रोज रोज एसएमएस काहे करेनीं ?

तहरा से छोह खातिर ?

तहरा से मोह खातिर ?

अरे बेवकूफ परेशान करे खातिर केहू आपन जरुरी होला ! एहसे !

----------------

पता ना लोग कइसे एक एक महीना ले ना नहावऽ. हमरा तऽ उनतिसवे दिन खुजली हो जाला.

बा रउरा लगे कवनो उपाय ?

----------------

एगो आदमी रामन्दिर में जाके भगवान से अपना भुलाईल मेहरारू के खोज देबे के निहोरा कइलसि.

रामजी बोललन - बगल का हनुमान मन्दिर में जाके निहोरा करऽ. हमरो मेहरारू ऊहे खोजले रहन.

-----------------------

जइसन बीतल वइसन भोगनी.

अब आगा से निमन बीतो.

जवन बीत गइल तवन बात गइल.

चलऽ फेर से नया शुरुआति कइल जाव !

---------------

जवन बीत गइल ऊ इतिहास हऽ,

जवन आवे वाला बा ऊ भविष्य.

हमरा तहरा हाथ में बस आजु के वर्तमान बा.

आवऽ हँसल जाव, खेलल जाव !

----------------

बतावऽ तऽ जानीं

वैलेन्टाइन डे १४ फरवरी के लोग अइसन का करेला कि नव महीना बाद १४ नवम्बर के बाल दिवस मनावे के पड़ जाला ?

-----------------

आपन हार आ मेहरी के मार

कहल ना जाला.

 

सह लिहल जाला !

----------------

उनके के सब पूछ रहल, धन बा जिनका पास

हमरा छूछे भाव के, के डाली अब घास

---------------------

तू हमरा ओरि ताकऽ,

हम तहरा ओरि ताकीं.

आ अँखिये अँखिये में एसएमएस कईल जाव!

----------------------------

भगवान करसु तहार बेटा जीये,

आ उमिर भर तहार खून पिये.

---------------------

हमरा ईहाँ अईबऽ त का का ले अईबऽ ?

तहरा किहाँ आयेब त का का खिअईबऽ ?

-----------------------

शुभचिन्तकजी, अईलन,

मुसकुरईलन.

चाय पियलन.

फेर कहलन,

बड़ा खराब हालत बा यार,

दे दऽ कुछ रुपिया उधार.

तबसे फेर मुँह ना देखवलन,

बढ़िया शुभचिनतक रहन.

शुभ आपन कईलन, चिन्तक हमके बनवलन.

------------------------------

सुनल हऽ कोर्ट एगो आदमी के बलात्कार के दोषी पाके ओकरा पर ११ हजार ४२० बीस रुपिया जुर्माना ठोक दिहलसि.

ई कवन हिसाब भईल ?

१०००० रेप करे खातिर, सैकड़ै चार का दर से वैट ४०० रुपिया, आ सैकड़ा १०.२ का दर से सर्विस टैक्स १०२० रुपिया !

---------------------

लक्ष्मीजी त हमार पतवे भुला गइल बाड़ी.

कहीं भेंटास त हमार इयाद दिया दीह.

आ कह दीहऽ कि हम इन्तजार करत बानीं.

------------------------

हाल दुनिया के का कहीं, यारे

झूठ के साँच बनावल जाता

देश के अबले ना सूरत बदलल,

झूठहूँ हल्ला मचावल जाता.

------------------

मुँह पर बड़ाई आ पीठ पाछा बुराई करे वालन से दुनिया भरल बा.

दोस्त ऊ होला जे मुँह पर दोष बतावे आ पीठ पाछा बड़ाई करे.

-------------------

हजार गो दोस्त बना लिहल आसान बा.

एगो दोस्त बनावल मुश्किल!

जे हजार गो दुश्मनन का सामने दोस्ती निभा सको!

----------------------

सपना देखि जुड़ा गइले जियरा

सपना अब ना देखावऽ हो राम !

जमीनी हकीकत सकारऽ आ लाग जा अपना काम में.

------------------------

साथी तहरा गाँव में,

कइसन मचल अन्हेर.

आवे जाये के डहर

सब दिहले बा घेर.

-------------------

जीयऽ...

जागऽ...

चूल्हा में लागऽ....

-----------------

"आठ कुआँ नौ बावड़ी, बा सोरह पनिहार

भरल घइलवा ढरकि गे हो, धनि ठाढ़ पछितात.

----------------

हम से रउवा बिछड़ के त देखीं कबो

नाहिं हियरा में आई करार तनिको

-----------------------

मरल आस- विश्वास जो अउर गइल मन हार.

तब बूझीं जे आदमी, भरलो-पुरल भिखार.

------------------------

सतसइया के दोहरे

अरु नावक के तीर

देखन में एसएमएस लगें

घाव करें गम्हीर.

-------------------

जिनिगी से अकुलाईं मत,

रो रो के पछताईं मत.

आँसू के कीमत समुझीं,

जहें तहें ढरकाईं मत.

-------------------

मन कहलस कि चलऽ एसएमएस करीं.

सोचनी कि ई पागलपन हऽ

रात अधरतिया केहू के एसएमएस कइल.

फेर सोचनी कि जाए दऽ

जेकरा के करत बानीं

उहो त पागले हऽ.

----------------------

साँच के हरान भले कर दिहल जाव,

हरावल ना जा सके.

साँच पर टिकल रहऽ ऐ दोस्त,

आखिरी जीत तहरे होखी.

-------------------

आज के काम काल्हु कइल जाई,

काल्हु के परसो.

जल्दी जल्दी का बा जब,

जिए के बा अभी बरसों.

---------------------------

जेकरा गरमी बरदाश्त ना होखे से चुहानी में ठाढ़ ना होखे!

---------------------

तन के, मन के, घर आंगन के कीचड़ पाँक हटा दीं.

प्रेम प्रीत के रंग अबीर हँस के खूब लगा दीं.

-----------------------

रात कब हो गइल, खुशी कब खो गइल, आँख कब रो गइल?

तोहरा वियोग में अस डूबल रहीं कि कुछ पता ना चलल.

-------------------

हँसेलऽ हँसावे खातिर,

रोवेलऽ सतावे खातिर,

एक बेर रुस के त देखऽ,

मर जाइब हम तोहके मनावे खातिर!

-----------------

हर खुशी के राह तहरा तरफ मोड़ दीं.

आसमान से तहरा खातिर चांद सितारा तोड़ दीं.

अतने से काम चल जाव त ठीक रही.

ना त कहऽ त दू चार गो झूठ आउरी जोड़ दीं?

-----------------

जोतिषी जी बतलवलन हा कि तोहरा मोबाइल पर अबहीं कंजूसी के महादशा चलत बा. जल्दी से एगो एसएमएस भेजि के ओकर शान्ति करावऽ ना त तहार मोबाइल चोरी हो जाए के पूरा अनेसा बा!...

--------------------------

दू गो दोस्त रहले.

नीमन दोस्त रहलें.

बहुत नीमन दोस्त रहलें.

बहुते नीमन दोस्त रहलें.

अरे छोड़ ना यार! हमनी से नीमन थोड़हीं रहलें...

----------------------

तहार नाम लेत भोर से साँझ करी ला,

हर पल तोहरा के अपना पास देखि ला.

जतना बेर साँस ना तू लेहत होखबू,

ओह ले अधिका त हम तोहके इयाद करी ला.

----------------------

हर जुबान पर तहरे नाम होखी,

हर कदम पर दुनिया के सलाम होखी,

मुश्किलन का सोझा डटल रहीहऽ,

दुआ बा हमार एकदिन,

सफलता तहार गुलाम होखी!

-------------------------

आठ गुणे तीन बराबर एगारह.

कइसे?

गलती से!

-------------------

अइसन त बात नइखे कि हम हरमेस इयाद आएम,

तबहूँ बा भरोसा, रउरा भुला ना पाएब.

-----------------------

वन्दे मातरम!

i==--..__..-=-._.

!!==--..__..-=-._;

!!==--..@..-=-._;

!!==--..__..-=-._;

!!

!i

!!

!!

!!

अमर रहे गणतन्त्र हमनी के!

----------------------

मीठ कि जइसे होखे मिसिरी,

तीत कि जइसे मिरचा झूठ.

इयार के बोली के कुछ सवादे आउर होला.

बस तू कहत रहऽ

हम सुनत रहीं!

----------------------------

नीमना दिन में दोस्त चिन्हेलें,

बाउर दिन में दोस्त चिन्हालें.

-----------------------

का हो गइल बा जे तू गलत राह पर ढेर आगा ले चलि गइल बाड़ऽ! 

लवटि आवऽ. अबहीं देरी नइखे भइल.

------------------------

सूअरन से कबो मत लड़ीहऽ.

तहार कपड़ा खराब होखी आ ओकनी के मजा आई.

--------------------------

गठरिया तोर कि मोर?

अगर कहलसि कि मोर त

पहिले कपरवा फोड़

फेर गठरिया छोड़.

---------------------

इहे जिनिगी हऽ :

-

तीन गो पुरान दोस्त,

तीन गो अलग अलग शहर,

तीन गो काफीके मग,

आ एगो इण्टरनेट मैसेंजर.

---------------------

पता ना तू कइसे भर भर महीना ना नहालऽ,

हमरा त उनतीसे दिन में खुजली हो जाला.

----------------------

नौकर अइसा चाहियें, माँग चूंग के खाय.

चारो पहर हाजिर रहे, घर कबहूं नहीं जाय!

--------------------

नदी में जहाज तू,

अकास में के चाँद तू.

फूल में गुलाब तू,

हीरा में कोहिनूर तू,

सबले बढ़ के

हमरा बाग के लंगूर तू!

------------------------

ना जाने कइसन एह जुग के असर बा,

पाथर का पहरा में शीशा के घर बा.

---------------------

बड़का वकील कानून जानेला, बढ़िया वकील जज!

------------------------

इयरवा से लागल बाटे इयरिया, पियवा से चोरिया चोरिया ना.

जा बचा के!.....

--------------------

एगो शरीफ आदमी मर गइल.

बीमा कम्पनी भुगतान देबे से इन्कार कर दिहलसि.

कहलसि कि....

ऊ जिअबे कब कइल कि बीमा करा लिहलसि?

--------------------

उड़ सकेलऽ?

संजीवनी बूटी ले आ सकेलऽ?

समुन्दर लाँघ सकेलऽ?

ना नू?

बेटा

खाली बानर लेखा मुँह राखला से

हर कोई हनुमान जी ना बन जाई!

-------------------

अखबार में पढ़नी ह कि

दोस्तन के एसएमएस भेजला से हार्ट पर असर पड़ेला.

बस, आज से बन्द!

का?

 

अखबार पढ़ल!

-------------------

जे तहरा खातिर काँट बने 

तू कर दऽ ओकरा भाला,

उहो सार समुझ जइहन कि 

पड़ल केहू से पाला.

---------------------

केहू खातिर चार पल के इन्तजार गरज हऽ, चार घण्टा भरोसा हऽ, चार दिन दोस्ती हऽ, आ चार जनम प्यार हऽ!

----------------------------

राजपूत के बाबू कहले, ब्राह्मण के खिअवले,

लाला के लेले देले, राड़ के लतियवले.

जइसन देवता, वइसन पूजा.

----------------------

फर्स्ट ना त सेकण्ड 

ना त थर्ड कहाँ जाई, 

पास ना त फेल 

केकरा बाप से रोकाई?

----------------------------

चढ़ल सेज स्वामी सजे,

रन बन में तलवार,

सूरज चान आकास में,

बिंदी बीच लिलार.

-----------------------

अइसन बानी बोलिये कि जम के झगड़ा होय,

पर ओहसे कुछ ना बोलिये

जो तुमसे तगड़ा होय..

-----------------------

गणेशजी के पेट जस बड़ खुशी,

सूंढ़ जस लमहर जिनिगी,

मूस जस छोट परेशानी,

आ लड्डू जस मीठ अनुभव मिलो.

---------------------

प्यार में वादा रहे कि अलगा होखला पर ना जीअम. ऊ आपन वादा पूरा कइलन आ प्रेमिका के बिआह का चालीसे साल बाद भरल पूरल परिवार छोड़ के गुजर गइलन.

----------------------

इन्सान वादा तूड़ेलें,

ईयाद इन्सान के तूड़ देले.

--------------------

मरद मूड़ी आ मेहरी गरदन होले.

गरदन मूड़ी के जब जेने मन करेला वोइसे घुमा लेले.

------------